Abitatge de loguèr ? Mission impossible en Aran

Lluc Doménech ,  hè 6 ans que viu en un pis de loguèr en Vielha.  Aguest, totun serà eth sòn darrèr iuèrn. En abriu se li acabe  eth contracte e eth propietari non l'ac vò renauir. 

Passe estones deuant der ordinador cercant pisi entà logar , o cromprar, mès sonque trape pisi toristics o de loguèr de sason, e es prètzi que demanen son fòrça nauti

Autant de venda com de loguèr es prètzi ara son fòrça nauti. Ei impossible aumens ena mia situacion. Jo è faena fixa, non crubi mau , mès non è era possibilitat de trapar un pis a on poga víuer e damb es mèns 26 ans,  poder estauviar entath futur

Ena madeisha situacion que LLuc se trape Blanca Tulleuda. Enguan a artenhut ua plaça de mieja jornada coma professora en Institut d'Aran.  A casa ena comarca deth Sobrarbe, en Aragon, e non pòt anar e víer cada dia.
Per aquerò e de manèra provisionau se quede a dormir dues dies per setmana en un otèl de Betren

Se artenhi a trebalhar tota era jornada, aurè de cercar ua auta solocion, e alavetz me traparè damb es madeishes dificultats que es mèns companhs. Aurè de cercar un pis compartit, perque es prètzi que i a entà víuer damb cèrta intimitat, e auer espaci entà ua persona soleta, ei fòrça difícil

D'auti companhs, an optat per anar a víuer ena Ribagorça. Ei eth cas de Sergi Pruna , que explique ,que ath delà, der inconvenient dera distància, cau somar es despenes de gasolina, eth desgast deth coche o es ròdes de nhèu. Ues despenes que supausen lèu eth 50% deth sòn salari 

A despiet qu'es administracions cerquen formules enta garantir loguèrs assequibles, era lei que regule es loguèrs de temporada aprobada recentament peth Parlament, non serà d'aplicacion en Aran es mesi d'esquí, que son justament es mès complicadi entà trapar abitatges