Acaben es trebalhs de milhora e condicionament deth camin dera ribèra de Vielha

Eth camin dera ribèra de Vielha, a ua longada de lèu 9 quilomètres , parallel ar arriu Nere. Ei un camin de cabanèra, qu' ei  fòrça soentejat per coches, bicicletes e tanben peth bestiar. 

En quauqui punts es eslorrades ocasionades pera ploja, era nhèu e eth gèu auien maumetut fòrça era cauçada, per aquerò ara s'amien a tèrme trebalhs de milhora ena part centrau, uns  600 mètres des de a on acabe era part hormigonada enquia er airau deth com. 

Es mashines an igualat eth terren, e s'a bastit ua coneta transitable en marge dret en direccion Vielha, entà facilitar damb eth desnivèu, era baishada der aigua dera ploja. Era cauçada tanben se harà  damb hormigon, fòrça mès resistent as incleméncies meteorologiques, com explique eth conselhèr d'infrastructures deth Conselh Generau d'Aran, José Luís Boya

Auem hèt eth nau paviment e era coneta damb ua lòsa d'hormigon. Era nauetat, entà agilizar es trebalhs,  ei que non s'an agut de hèr estructures de hèr entà bastir es conetes, senon que en madeish  hormigon se i an barrejat fibres, que hèn que sigue mès resistent

Entar alcalde de Vielha, Juan Antonio Serrano,   auer en bones condicions eth camin,  garantís ua  via alternatiua ara  carretera nacionau 230 , en cas de emergéncia ,en tram que va dera boca nòrd deth tunèl enquia Vielha.

En cas que i auesse bèth problèma ena carretèra en aguest tram, aguesta poderie èster era gessuda d'emergéncia  e de seguretat, e per aquerò ei de besonh que sigue en bon estat entà facilitar eth trànsit des veïculs

Damb eth plan de camins deth 2026 deth Conselh Generau d'Aran , que auie ua partida de 300.000 euros tanben s'an apariat es camins de Arròs a Varradòs e eth Pònt d'Arró ara Bordeta.