Activitat de lauegi en Centre de Lauegi d'Aran: sason intensa
Era sason 2025-2026 a estat fòrça intensa entath Centre de Lauegi d'Aran, damb registres de nhèu fòrça peth dessús dera mejana e ua activitat de lauegi que non se vedie dempús de hè lèu ueit ans.
Mès de 7 mètres de nhèu
Segons er informe publicat en sòn blòg, lauegi.report, ena estacion de Comalada s'an acumulat 711 centimètres de nhèu entre noveme e abriu, fòrça per dessús dera mejana istorica des darrères 23 sasons.
Factors qu'afècten ara cocha de nhèu
Es nheuades persistentes de gèr e hereuèr, acompanhades de fòrça vent, an marcat un iuèrn fòrça actiu e complèxe entara gestion deth risc.
Eth vent qu'a acompanhat as nheuades ath long der iuèrn, era gibra o eth povàs deth Sahara an estat bèri uns des factors qu'an afectat ara cocha de nhèu.
Montse Bacardit, Jordi Gavaldà e Sara Orgué, es tecnics deth Centre de Lauegi que mos an acompanhat en programa de 'Eth maitin d'Aran' ath long der iuèrn damb es bulletins diadèrs remèrquen:
qu'es capes febles persistentes ena basa deth celh sigueren un des principaus factors de risc d'aguesta sason
Era carretèra C-28 14 dies barrada per lauegi
Un des hètz mès destacadi dera sason ei qu'enes pales qu'afècten ath Pòrt dera Bonaigua e er accès tà Beret s'an cartografiat 106 lauegi, 54 d'eri qu'arribèren ena carretèra. Açò a obligat a barrar era C-28 pendent 14 dies e a realizar enquia 7 campanhes de desencadiament artificiau damb era Daisybell.
Eth Centre de Lauegi destaque qu'ei era sason damb mès activitat des dera 2017-2018.
Iuèrn damb molti accidents
En çò que tanh ara seguretat ena montanha, ena Val d'Aran s'an registrat 45 plaques accidentaus provocades per persones e 11 accidents damb gent implicada. Eth cas mès tragic siguec eth deth barranc de Laveja, eth 18 de gèr, a on un laueg provoquèc era mòrt d'ua persona.
En conjunt des Pirenèus, aguest iuèrn s'an comptabilizat 12 victimes mortaus per lauegi.
Es collaboradors, ua airina impresdincibla
Es bulletins que se hèn ath long der iuèrn, se premanissen en basa as perfils e gessudes ara montanha des tecnics deth centre en collaboracion des agents de miei ambient deth CGA e de tot un hilat d'observadors que les hèn arribar es sues donades e avistaments.
Gràcies ara app Floc, disponible tà Android/iOS, toti podem devier collaboradors e aportar es nòstes aportacions sus eth registre der estat de nhèu, lauegi e accidents e atau contribuír a premanir eth Mapa de condicions que preamissen des deth Centre de Lauegi d'Aran