Campanaus de Pujòlo , es naui guardaders

Era glèisa de Santa Eulàlia d'Unha, ei un temple d'origina romanica bastit en segle XII, damb ampliacions posteriores des segles XVI e XVII.

Eth sòn campanau, plaçat en un des angles siguec bastit en segle XVII, e constituís un des elements destacats deth conjunt arquitectonic. 

Era tor arrinque damb planta quadrada, entà passar dempús a octogonau e rematada per un tet , fòrça diferent ara rèsta dera Val d'Aran, pera sua forma d'influéncia orientau.

Eth pas des ans, hè de besonh trebalhs de restauracion e consolidacion dera estructura interiora dera tor e eth rebastiment integrau dera escala  entà garantir un accès mès segur e foncionau. 

Ues òbres que an tanben com objectiu, com explique era alcadessa, Esther Bruna,  hèr qu'era tor sigue visitable, en tot perméter er accès a un des guardaders , pòc coneishut deth terçon de Pujòlo.

Pensam qu'ei un monument molt emblemàtic d'Unha, molt visitable, qu'ei un ben tath pòble. Volem invertir ena glèisa tà qu'era gent de dehòra  le pogue visitar e tanben es vesins

Eth campanau de Unha, s'ahig atau ,as campanaus des glèises de Sant Andrèu de Salardú e  Sant Fèlix de  Bagergue, a on dejà s'organizen  visites guidades entà poder pujar ena tor.

Entara Entitat Municipau Descentralizada d'Unha, aguesta  restauracion, ath delà de garantir era conservacion deth patrimoni, ahig un element mès d' interès  entà visitar eth pòble e era glèisa,  que consèrve ena paret der absis centrau pintures ath fresc romaniques  de gran valor artistic, entre es que en subergés ,era cara d' un Crist en majestat laguens dera mandòrla mistica. Tanben destaquen eth conjunt de pintures muraus deth segle XVI, enes murs, que representen diferentes escenes dera passion  e era mòrt de Crist, eth judici finau  e episòdis biblics.

En exterior s' a hèt  ua intervencion entà reordenar eth cementèri plaçat deuant dera entrada principau dera glèisa . S'an retirat damb eth consens des vesins, es vielhes creus, e s'a optat per plaçar petites plaques en tèrra . A compdar d'ara es naui enterraments se haràn ena part posteriora deth temple.

Es òbres deth campanau an un pressupòst de 76 mil euros que se finançaran damb er ajut deth Plan Unic d'Obres e Servicis dera Generalitat e de hons pròpis dera EMD de Unha.