Campus esportiu en Beret entà esportistes damb discapacitat

Aguesta setmana Beret a acuelhut eth Campus Fundacion Occident a on esportistes andicapats an pogut entrenar damb es tecnics deth CDIA, Centre d'Espòrts d'Iuèrn Inclusius d'Aran, entot cercar ua formacion adreçada ara competicion com era que s'auie de celebrar ena dimenjada, era 1ª fasa dera Copa España Inclusiva qu'organize era RFEDI, mès qu'a demorat adiada peth mau temps. 

Eth campus acuelh a esportistes damb o sense experiéncia prèvia en espòrts d'iuèrn, qu'arriben de d'autes disciplines com era natacion, eth ciclisme o eth surf a on ja an artenhut era excelléncia e que ara cerquen naui reptes e qui sap, poder arribar a disputar uns jòcs d'iuèrn paralimpics  en un futur. 

En aguesta edicion an participat esportistes com Ricardo Ten, qu'a guanhat onze medalhes en natacion e ciclisme en 6 participacions qu'a agut enes jòcs paralimpics entre 1996 e 2024 o David Levecq, tanben damb 6 jòcs paralimpics d'ostiu en que a guanhat 3 medalhes en natacion. 

D'auti non son tan coneishudi entath gran public mès tanben son esportistes d'elit com Joan Giralt, qu'a estat campeon d'espanha de natacion adaptada, Mireia Cabanyes, campeona d'Europèa de parasurf en 2025, Eric Gonzalez conferenciant e esportista o Xabi Osa, que a estat eth tresau milhor atleta deth mon ena categoría adaptada de Crossfit e que ara se plantegen poder arribar a uns jòcs paralimpics d'iuèrn en un futur.