En quin punt se trape eth projècte entà bastir abitatges prefabricadi tà trabalhadors en Aran?

Eth projècte entà bastir abitatges prefabricadi ena Val d'Aran entà lotjar trabalhadors de sason a prètzi redusits cerque era implicacion deth sector public entà poder amiar-se entà deuant. Eth plantejament iniciau, mès ambiciós, s'a modificat e, ara, es sòns impulsors estúdien hèr-lo per fases. 

Eth projècte prevedie iniciauments bastir en uns terrens de Vielha enquia 6 bastisses modulars fabricades prèviaments en Alacant. Aciu s'i poirien acuélher mès de 200 trabalhadors en abitacions individuaus o dobles damb prètzi maxims de 320 èuros ath mes.

Eth sector otelèr avalèc era prepausa, mès entà poder-la amiar entà deuant, era enterpresa que la impulse, era andorrana LIVINGREEN, cerque tanben era implicacion deth sector public, coma explique eth sòn CEO, Pedro Arroyo: "en camin mos auem trobat que i a sectors, coma eth dera seguretat, era educacion o era sanitat, que an un besonh important d'abitatge entàs sòns professionaus". Per aquerò, en aguesti moments, era enterpresa andorrana cerque barrar damb aguesti organismes publics era signatura des nomentades 'cartes de compromís' entà poder demostrar, deuant des inversors, que eth projècte ei viable.

De hèt, podem díder, precisament, que mos trapam en aguest punt. Er interès, - e eth besonh- entà que tire endauant eth projècte i é, mès ara, coma constate Arroyo, cau assegurar es sòs: 

Ara mos cau captar es hons necessaris e, per aquerò, mos cau demostrar deuant des inversors, per escrit, qu'era demanda ei reau

Precisament sus aguest interès deth sector otelèr e de servicis ne parlaue tanben en Eth Maitin d'Aran, eth president deth grèmi d'Ostaleria dera Val d'Aran, Carles Sigüenza: "Eth projècte ei viu. En grèmi d'Ostaleria er interés existís, mès tanben i a ua part dera Administracion interessada e, ací, es estructures que an de validar er interés no van tan rapides coma voleríem. Sabem que eth capital i é, més cau ratificar eth compromís". 
 

Per fases e en d'auti emplaçaments

Tanben cau díder qu'eth projècte a agut modificacions respècte es plantejaments iniciaus. Era enterpresa a estudiat d'auti possibles solars e ara se plantege bastir per fases segontes era demanda: "era idèa ei no bastir tot eth projècte ena sua totalitat, senon anar per fases. Aquerò mos permeterie anar mès rapid e milhorar eth producte enes següentes fases", soslinhe Arroyo. 

Maugrat qu'eth projècte auance e qu'eth sector otelèr desire que sigue prèst tar iuèrn que ven, LIVINGREEN apunte que serie possible entara sason 27-28. Un còp barrat eth finançament, calerie sollicitar era licéncia d'òbres e a compdar d'aciu "auem de besonh 12 mesi d'òbres", afirmen.