Era Marcha Beret 2026: 750 inscrits e victòries de Martí Vigo e Irati Cuadrado
Un an mès era Marcha Beret a tornat mostrar eth sòn poder de convocatòria. Ena 46au edicion an estat 750 inscrits, as que cau híger es 140 que disputèren er esprint dera copa Espanha de dissabte. Açò la torne a plaçar coma era pròva d'esquí de hons mès multitudinària des que se hèn enes dus costats des Pirenèus.
Com cada an tàs 10 deth maitin se daue era gessuda entàs 750 inscrits en aguesta edicion. Deuant es que lutauen contra eth cronomètre e, ath darrèr, era grana majoria que profiten aguest dia tà dar un torn ath Plan de Beret en companhia d'amics e familiars.
Era pròva de 42 quilòmetres, damb 95 participants, vedie coma ena categoria masculina s'imposaue er esquiador aragonès Martí Vigo damb un registre de 2.10:20. En pòdi lo acompanhèren Christian Gostout (FRA) a +3.48 e Lander Martín a +8.09 Bernat Gabarró a 10'18 e Oier Ibergallartu a 12'38.
En categoria femenina era navarresa Irati Cuadrado guanhaue damb un temps de 2.29:29 a Laura Orgué que entraue a +14.20, Cynthia Martínez a +28:55, Alaia Juaristi a 59' e Nerea Etxebarria a 1 ora 1' completèren eth pòdi en hemnes.
227 inscrits i auie ena distància de 21 quilòmetres, a on es mès rapids que sigueren Bernat Cadena en òmes e Joana Puig en hemnes.
Era distància de 10 quilòmetres ei era mès populara de totes damb de 338 inscrits. Es gojats mès rapids completèren eth recorregut en pòc mès de mieja ora. Roc Albets s'imposaue ar esprint a Andde Elizburu ena linha d'arribada.
En categoria femenina dues araneses en pòdi e 2 mès en top 10. Era victòria siguec tà Libe Curras, 36:33; dusau era esquiadora deth CAEI e deth Centre de Tecnificacion dera Val d'Aran, Fiona de Castellarnau. tresaua Tana Hidalgo, quataua Iradi Elvira e cincaua era tanben esquiadora deth CAEI Illargi Mombiedro.
Fin finau ena Mini Beret damb lèu 90 inscrits tà hèr es 5 quilòmetres, en pòdi domini des esquiadors francesi des clubs Montangards Argelesiens e dera Val d'Azun.
Dissabte, er prumèera pròva dera Copa Espanha Iberdrola de esprint compdèc damb 140 participants, tot un rècord ena disciplina. Irati Cuadrado s'imposaue ena categoria absoluta en hemnes mentre qu'en òmes eth guanhador que siguec Peio Añarbe.
D'auti nòms destacadi
Eth president dera RFEDI May Peus, animaue a toti es que les agrade aguesta disciplina que non deishen passar era escadença de participar er an que ven.
Eth Conselhèr d'Espòrts deth Conselh Generau d'Aran, Javier Cavero, destacaue qu'era Val d'Aran ei un escenari unic entà acuélher competicions de naut nivèu'.
Ath sòn torn eth director comercial de Baqueira Beret, Xavi Ubeira, metie en valor eth trabalh hèt pera organizacion dempús des continues nheuades damb ua mencion especiau as maquinistes e era equipa de Stadium.
Toti es resultats dera corsa les podetz consultar ena web Marcha Beret