Espleita de mès de 13 mil tones d'husta de 8 bòsqui publics

En bòsc dera Tuca, en parçan  de Pales  de Sòto,  a tocar deth barranc de Sant Esteue en tèrme de Betren , i a arbes mercadi damb pentura de color blu. Ei ua des 8 espleites despartides  enes montes publics de Vielha Mijaran, Arres, Bossòst, Es Bòrdes, Betren, Arties, Garòs, e Arròs e Vila qu' eth Conselh Generau a trèt a subasta enguan. Eth conselhèr d'òbres e infrastructures, José Luís Boya,  detalhe es caracteristiques des adjudicacions, 

Eth totau d'husta que treiram serà d'apruprètz ues tretze mil tones, dètz mil de husta de ressèc e ues tres mil de biomassa. Eth prètz totau des subastes vire ath torn des dus-cents cinquanta mil euros, que crubaran cadun des ajuntaments 

Es lòts son en airaus de bòsc pobladi sustot damb auet comun, hai e pin ròi. Era màger part son arbes entà ressèc o hustables , era rèsta entà biomassa.

Eth critèri tostemp ei tecnic. Se trèn es arbes vielhs e malauts e es  que perjudiquen eth creishement des arbes joeni que possen.

Es ajuntaments  e entitats menors descentralizades,   an delegat en Conselh Generau d'Aran  era organizacion des subastes,  entà hèr ua gestion controtlada des bòsqui,   e ei per aquerò que eth govèrn s'encuedarà de susvelhar, que es rematants complisquen es condicions fixades en contracte

Es plecs tecnics, mèrquen com s'a de talhar eth brancatge. S'a de talhar a ua mesura determinada entà facilitar que se poirisque, çò mès rapidament possible entà que se pogue recuperar era biodiversitat

Coma mesures de contròtle se plaçaran càmeres automatiques e s'haràn pesatges aleatòris des camions. Era tecnica forestau e es agents de miei ambient haràn eth seguiment periodic des bracades.

Es 4 empreses adjudicatàries des 8  subastes  dispausen de 18 mesi entà hèr es trebalhs