Espòrt adaptat ena escòla

Es alumnes  deth cicle superior des escòles de Salardú, Arties e  Es Bòrdes, s'an amassat en poliesportiu de Salardú entà hèr espòrt, mès en aguesta ocasion se meten ena pèth de mainatges e mainades dera sua edat qu'an ua discapacitat fisica.

Atau , despartidi per corròps participen en diuèrses disciplines : er slalom damb cagira de ròdes, "era bòtja" ,que ei ua sòrta de petanca, eth vòlei seiguts e eth basquet en cagira.

Era activitat , com explique Laura López,  fisioterapeuta ,der Equip d'Atencion Psicopedagogica, a com objectiu  crear consciéncia e fomentar autant era sensibilizacion respècte er espòrt adaptat, com era acceptacion dera diversitat e era singularitat des persones

 Cau trincar barrères d'interaccion e es estereotips que i a a nivèu sociau , sus es persones damb discapacitat. Pensi, que en cau parlar entà que se pogue normalizar. Ara fin çò que volem transméter ei qu'era diversitat forme part dera normalitat dera nòsta societat

Damb charrades teoriques en aula, e era activitat practica, es alumnes aprenen qu' er espòrt adaptat, a despiet qu'ei mès complicat e requerís mès esfòrç,  ei un èish vertebrador dera inclusion. 

Entà Martina Arribas, alumna dera Escòla Loseron d'Arties:  "Toti es mainatges e mainades  damb discapacitat, an eth madeish dret que nosati de poder jogar e practicar espòrt,  perque se s'esfòrcen, pòden".

Eth programa "Espòrt adaptat ara escòla " qu'impulse era Federacion Catalana d'Espòrts de Persones damb discapacitat fisica e era Diputacion de Lleida,  a arribat enes  escòles araneses a trauèrs dera direccion dera ZER , era Zòna Escolar Rurau, e era fisioterapeuta der Equip d'Atencion Psicopedagogica  deth Servici Educatiu Val d'Aran-Alta Ribagorça..