Eth ramat de oelhes e crabes d'Ovihuec peisherà dejós des linhes electriques

Endesa s'ahig ath projècte entà hèr deth ramat comunitari de Vilamòs , un recurs mès entà reduir era vegetacion dejós des hilats de mieja e nauta tension, com mesura de prevencion de huecs

Jovita Ané e Josep Manel Vera

Lèu 300  oelhes e crabes, deth ramat comunitari de Vilamòs,  formen part deth projècte Ovihuec.sost, ua iniciativa que desvolope er ajuntament, eth Conselh Generau d'Aran e er IRTA, que a com objectiu analizar e demostrar era viabilitat dera ramaderia extensiua , entara milhora dera biodiversitat ,era recuperacion der entorn naturau, e sustot entara prevencion de huecs.

Es oelhes e crabes d'Ovihuec pèishen ar entorn de Vilamòs (3catinfo)

Ei  aquesta linha , era de hèr servir eth  ramat entà limpiar eth boscatge  e es matarrassi , enes parçans deth municipi a on i a linhes electriques, que a portat a Endesa a incorporar-se ath projècte.

Detalh linhes electriques Vilamòs (Endesa)

 Aguesta pròva  pilot ei especiaument importanta tara companhia, perque mès des 53.000 quilomètres de linhes aerianes en Catalunya,  passen  per airaus damb vegetacion e requerissen gestion constanta. Ei  per aquerò  que es peishius dirigidi des oelhes e es crabes permeteran reduir  de manera sostenguda era carga de combustible vegetau en lòcs de dificil accès, çò que les convertís en un recurs complementari as actuacions que de manèra periodica e preventiua amie a tèrme era empresa, dejós des linhes de mieja e nauta tension,   que combinen era bracada , damb er espodalhament dera vegetacion, damb tecnologies auançades e innovadores.

 

Operaris hènt trebalhs de mantieniment de linhes electriques (3catinfo)

 

Atau ac explique eth responsable der hilat de distribucion d'Endesa en Lleida, José Moreno ,

Endesa s'intègre en aguest projècte totaument sostenible, basicament peth besonh de mantíer net eth sotabòsc, e poder garantir atau era qualitat deth subministrament e evitar huecs forestaus. Daurís un camp mès entath mantieniment der hilat electric
 

Ovihuec ei liderat cientificament per IRTA , que n'assumís era coordinacion, eth seguiment e era evaluacion des resultats que ajudaran segons er investigador en benèster animau, Antoni Dalmau , a "definir es models  gestion que se poguen aplicar en d'auti endrets".

Er acòrd de collaboracion d' Endesa  damb Ovihuec, a ua durada d' un an prorrogable,  e establís  ua aportacion de 20.000 euros ath projècte.