Francesco Marcini: de lutar contra un limfoma a subcampeon de Catalonha de bòxa

Francesco Marcini, ei un joen de 21 ans neishut en Itàlia mès establit en Aran d'ençà de hè fòrça ans. En pòc mès de 2 ans, aguest joen integrant deth Club de Boxa Aran s'a convertit en un des nòms a seguir ena bòxa catalana. 

Ua istòria de superacion

Era sua trajectòria, mès enlà des resultats esportius, ei mercada pera fòrça de volontat. Hè dus ans, Francesco Marcini auec de lutar contra un càncer, un linfòma, ua malautia que, luenh d'aluenhar-lo der espòrt, encara reforcèc mès era sua determinacion. Pendent eth tractament de quimioteràpia non deishèc d'entrenar entot premanir-se damb un objectiu, tornar ath ring. 

Er an 2025 siguec un an fòrça important entà eth. En sòn debut enes Campionats de Catalonha se proclamèc subcampeon ena categoria de promeses debutants, dempús d'imposar-se en diuèrsi combats e demostrar un gran nivèu competitiu. Francesco, que competís damb eth subernòm de 'eth fenix sicilian' (en referéncia ara malautia que supèrec e as sues origines), ja a disputat ueit combats de bòxa olimpica damb un balanç fòrça positiu: sies victòries e sonque dues derròtes. 

Ara, aguest joen damb un fisic espectacular, que hè uns entrenaments dignes de Rocky, era pellicula de Silvester Stallone, torne a entrenar entà disputar de nau eth Campeonat de Catalonha, aguest viatge ena categoria elit de pes superpesat, de mès de 92 quilos. Er objectiu ei fòrça clar: lutar peth títol e daurir-se era pòrta entàs campionats d'Espanha. 

Ath sòn costat i a eth tecnic Roberto Nuñez, eth responsable deth Club de Bòxa Aran que compde damb grops d'entrenament en Salardú, Bossòst e Vielha. Er entrenador destaque de Francesco: 

era sua disciplina, eth sacrifici e era fòrça mentau que à, lo a convertit en un exemple entàs auti joeni dera Val d'Aran que comencen a entrenar en aguest espòrt 

Objectius

Quan non ei en gimnàs, Francesco trabalhe ena pizzeria familiau en Vielha. Mès eth sòn cap ei en quadrilater, a on, vestit damb eth pantalon de combat a on pòrte era bandèra italiana, un rebrembe des sues origines, eth joen boxejador pense en escríuer un nau capítol dera sua istòria esportiua e personau, en tot perseguir eth sòn objectiu, proclamar-se campeon de Catalonha e d'Espanha. E com somiar ei gratis, dilhèu tanben pense en anar a uns Jòcs Olimpics o èster profesionau d'aguest espòrt.