Lengua Viua amplie er itinerari literari de Mossen Jusèp Condò Sambeat

Lengua Viua agranís era peada literàra de Mossen Jusèp Condò Sambeat. 
Aguest ostiu, eth collectiu a incorporat quate naui plafons ath sòn itinerari literari. D'aguesta manèra, eth projècte que començaue en 2019 damb eth plaçament deth prumèr plafon enes cubèrts der Ajuntament de Vielha e Mijaran, vò hèr present era poesia de Condò en mès pòbles dera Val, e, ath temps, mostrar era estima des aranesi pera sua lengua. 
 

Bagergue
 

Eth 1 d'agost, Bagergue siguec eth prumèr des naui emplaçaments d'aguest ostiu que s'ahig as plaçades en Vielha, Montgarri e Les. Eth fragment que podem veir e lieger ditz atau: "Dera Val d'Aran me cali pera polida ribèra, qu'ei era mès bèra cunhèra, qu'an es rius de tot eth mon", e hè part dera òbra 'Cançon dera Garona'.

Canejan 

Eth 8 d'agost eth projècte arribèc en Canejan. Eth plafon, plaçat ena plaça damb vistes ara lana de Les, tanben recuelh un fragment de 'Era Val d'aran', en qué Mossen Condò descriu era Val d'Aran coma "era ribèra mès polida de tot eth Pirinèu". 

Sant Joan de Toran 
 

Eth madeish dia, era peada de Condò contunhaue en Sant Joan de Toran, tanben laguens deth municipi de Canejan. 
Eth plafon qu'a estat finançat pera empresa Aran&Arte, a diferécia dera rèsta que son finançadi pes ajuntaments, remasse un fragment dera òbra titulada 'Era Val d'Aran' que met en valor era sua singularitat deth lòc entre es tucs e es termières. 
 

Era presidenta dera entitat, Immaculada Caubet, a explicat que: 

er itinerari non a sonque coma objectiu méter en valor era figura de Condò. Er objectiu ei que cada pòble dera Val d'Aran age un bocin dera sua poesia coma mòstra dera estima pera lengua pròpia. 

Salardú
 

Eth plafon se place ath cant des escales que pugen enquia era glèisa de Sant Andrèu de Salardú, e recuelh un fragment dera poesia de Condò 'Era veu deth campanau' dedicat as campanes dera vila. 

'Nin-Nan! hèn es campanes, òh vila gloriosa de Salardú, penjades en tòn bèth campanau; tamb sa votz fòrta e doça amarga e amorosa, conden ath mon ta istòria, cada ua en sòn hiestrauque hè des campanes era votz' 

Un itinerari que creish 

As quate panèus d'aguest ostiu, Bagergue, Canejan, Sant Joan de Toran e Salardú, calerà ahiger es que se vòlen plaçar ena tardor, Unha Tredòs e Bossòst. 

Era iniciativa cerque que, damb eth temps, es pòbles dera Val d'Aran se poguen convertir en punts d'un gran itinerari literari. Es tèxtes non s'an escuelhut ara leugèra. Era idia ei que cada panèu age un tèxte relacionat damb eth lòc a on ei plaçat e que, atau, eth camin pera Val sigue tanben un camin pera literatura aranesa. 
 

Eth projècte prevé, ath delà, incorporar còdis QR enes panèus que permeteràn accedir a contenguts digitals e informacion complementària en cinc lengües: aranés, catalan, castelhan, francés e anglés. 
Era naua plataforma ei encara en desvolopament, e era volontat ei que sigue ua airina entà hèr mès accessible era òbra de Condò e era literatura aranesa. 
 

Era cançon dera Garona e d'auti poèmes

Es escrits des pannèus hènt part dera òbra literària de Mossen Condò. Com 'Eth cant dera Garona' Medalha de bronze enes Jòcs Floraus dera "Scolo deras Pirenéos"a Bolonha en 1913. 

Damb motiu deth centenari dera mòrt deth poèta en 2019 vos aufrirem TASTETS DE CULTURA. 14 microespacis radiofonics proposadi peth Departament de Cultura e Lengua deth Conselh Generau en collaboracion damb eth programa Eth maitin d'Aran.