Marcos Laguna fotografie des d'Arròs er eclipsi parciau de Lua

Eth cèu seren a permés observar er eclipsi parciau de Lua, a diferència deth passat eclipsi de Solei
Jòse Badia Dominguez

Era Val d'Aran a pogut veir aguesta maitiada er eclipsi parciau de Lua, un fenomèn que s'a produsit sonque setze dies dempús der eclipsi totau de Solei deth passat 12 d'agost. En sòn punt maxim, tàs 6.12 deth maitin, un 93,9% deth disc lunar a demorat laguens dera ombra dera Tèrra. 

Aguest còp, ath contrari de çò que passèc damb er eclipsi de Solei, eth cèu a acompanhat. Eth 12 d'agost es bromes impediren seguir eth fenomèn ena Val d'Aran e sonque deishèren veir eth Solei eclipsat pendent bèth moment. 

es bromes impediren veir des deth Clot der os en Beret er eclipsi de solei eth 12 d'agost

Aguesta maitiada, en cambi, eth cèu seren a permetut observar era Lua, tostemp qu'era orografia non l'amaguèsse. 

A diferencia der eclipsi de Solei, qu'amassèc fòrça gent e generèc ua grana expectacion, er eclipsi de Lua a passat fòrça mès desapercebut. Era ora, de maitiada, non ajudaue e, ath delà, ena Val d'Aran era Lua se trapaue fòrça baisha sus er orizon cap ar oèst-sud-oèst, çò que hège que calesse cercar un punt naut o damb er orizon pro dubèrt entà poder seguir-lo. 

Un des que non se l'a volut pèrder a estat Marcos Laguna, @marcos_laguna, fotograf de natura e astrofotograf. E aguest còp non s'a agut de desplaçar: l'a pogut fotografiar des de casa sua, en Arròs. 

Laguna ja auie viscut intensament er eclipsi totau de Solei deth 12 d'agost. Alavetz anèc enquia Leon, a on acompanhèc e guidèc un grop de fotografs internacionaus, entre eri bèth astrofotograf vinculat ara NASA. 

 

Eclipsi totau de solei fotografiat en Leon (Marcos Laguna)

Ara, sonque dues setmanes dempús, a completat aguesta experiéncia damb er eclipsi parcial de Lua. 

Eth madeish fotograf explique qu'es dus fenomèns non se pòden comparar, mès considère extraordinari auer pogut documentar-les damb sonque quinze dies de diferéncia. 

 

Poder fotografiar es dus eclipsis en tan pògui dies ei ua grana sòrt e ua grana illusion. Son fenomèns fòrça diferenti, mès complementaris, e ara ja les è sauvadi entà tostemp, ena retina e ena camèra." 



En aguest cas, ath delà, era experiéncia a estat fòrça mès intima: sense viatges ne granes concentracions, sonque damb era camèra premanida e era Lua baishant sus es montanhes dera Val. 

Entath pròxim eclipsi totau de solei der an que ven, ja a programat un viatge tà fotografiar-lo en sur d'Espanha.