Mès de 200 pisi de Naut Aran non pòden anonciar-se en internet

Un totau de 205 estatges toristics de Naut Aran plaçats enes entorns dera estacion d'esquí de Baqueira Beret non pòden anonciar-se enes plataformes digitaus pr'amor que non complissen damb toti es requisits qu'ara exigís eth Govèrn Espanhòu entà figurar en nau registre de loguèr d'estatges toristics. Era mesura, que preten méter limits as loguèrs de sason e vacacionaus, ei efectiva d'ençà de junhsèga.  

Segons a pogut saber 3CatInfo de hònts deth Registre dera Propietat, qu'ei qui autrege es numèros d'identificacion entà poder inscríuer es estatges, era grana majoria d'aguesti 200 abitatges presenten defèctes de forma enes sollicituds. 

Son defèctes qu'an a veir, per exemple, damb era signatura digitau deth formulari o que simplaments non s'an ramplit ben es donades o non s'a junhut documentacion. Totun, a efèctes legaus, peth moment, non pòden anonciar-se coma Abitatges d'Usatge Toristic. 

Es madeishes hònts indiquen qu'aguesti 200 pisi "no son illegaus", pr'amor que complissen toti es requisits que mèrque era lei catalana, mès ara auràn de presentar ua naua instància entà figurar en registre de loguèr d'estatges toristics. Se tracte de defèctes que pòden èster resolvudi se presenten ua naua instància.  
 

Politiques d'abitatge contraposades

Eth Govèrn espanhòu plantege que toti es estatges toristics non regularizadi s'acaben en tot convertir en loguèrs de longa durada. Un ahèr, qu'eth baile de Naut Aran, Cèsar Ruiz-Canela, escarte: 

"Eth mercat regule. Totes aguestes viuendes turistiques jamès serien destinades a trabalhadors. Qui se crompe ua casa per 1 milion o 2 milions d'euros non te la va a logar a 600 euros"

Deth sòn costat, eth Conselh Generau critique era politica d'Abitatge de Naut Aran, qu'empedís, ara practica, er accès ar abitatge a vesins e a trabalhadors de sason. Segons era sindica d'Aran, Maria Vergés, "Naut Aran s'a negat a regula'c. Aguest ei eth sòn modèl de municipi". "Pensi qu'ei un modèl totauments erròni e qu'aguestes donades mos aurien de hèr a pujar es colors a toti", ahig. 

Damb 1.900 abitants, Naut Aran a lèu 7.000 places en abitatges d'usatge toristic en un totau 1.270 estatges.

En conjunt dera Val d'Aran sonque eth 36% de toti es abitatges bastits son prumères residéncies.