Miquèu Delaurens aumenatjat damb era equipa especiau deth Fòrça Lheida

Ena mieja part deth partit dera liga ACB deth Hiopos Lleida contra eth Burgos deth passat 24 de gèr, era equipa especiau deth Força Lleida e era Fundacion Aspros, Atlas Lleida, a on jògue eth joen de Bossòst, Miquèu Delaurens Gallart recebie er aumenatge deth club e era aficion.

Damb es sòns companhs e companhes, Miquèu Delaurens, participèc eth passat 17-18 de gèr en Valencia ena prumèra jornada d'aguesta competicon. En partit que disputèren deuant eth Mora Bank Andòrra artenhèren era victòria, 21-17, e açò les valèc eth tresau lòc ena Copa Campeones, era prumèra liga de basquetbòl deth mon entà persones damb capacitats especiaus impulsada pera Fundación ACB. 

Espòrt inclusiu

Aguesta ei ua naua competicion de basquetbòl inclusiu impulsada pera Fondacion ACB (era organizacion dera ACB, era Liga Endesa de basquet) e ei considerada com era prumèra liga nacionau deth mon d'aguest tipe. Ena Copa Campeones, persones damb discapacitat intellectuau, pòden participar en tot representar as equipes vinculadi as clubs dera Liga Endesa. 

Eth tornèg compde damb era participacion des 18 equipes dera Liga Endesa, repartidi en grops de sies, tà disputar es tres jornades programades. Era prumèra se hèc en Valencia eth 17-18 de gèr, es autes dues en Manresa e Bilbao enes mesi de març e mai.

Aguest ei un tornèg non competitiu pensat entà promòir era inclusion sociau e tà hèr que toti se sentisquen guanhadors. Er objectiu d'aguestes competicions ei ajudar a trincar prejudicis e a normalizar era preséncia de persones damb discapacitat en eveniments esportius de naut nivèu. 

Miquèu Delaurens Gallart, ath delà de jogar a basquet tanben se li da ben eth fotbòl, auie jogat damb era equipa deth sòn pòble, era UE Bossòst, tòque era guitarra, li agrade eth metal coma estil musicau mès tanben eth grop Nadau e sustot era cançon 'Era Immortèla', e ara vò apréner a tocar era bateria.