Núria Castán, medalha de bronze, hè istòria en Mondiau de Freeride FIS
Núria Castán Baron a hèt istòria en convertir-se ena prumèra medalhista en uns Mondiaus de Freeride FIS disputadi en Basser Negre d'Ordino Arcalís (Andòrra). Era freerider catalana signèc ua baishada fluida e tecnica, que li dèren 79 punts e era medalha de bronze, per darrèr de Mia Jones (USA) que guanhaue er òr e Noémie Equy (FRA) s'emportaue era d'argent.
Tanben en surf de nhèu, Pol Sabidó acabèc en top 5 en snowboard damb ua linha fòrça completa, mès ua caiguda en un saut li impedic pujar ath pòdium. Eth guanhador siguec eth suís Liam Rivera seguit de Victor de le Rue (FRA) e Michael Mawn (USA)
Esqui
Abel Moga, que siguèc eth darrèr des competidors d'esqui en gésser, signèc era baishada mès espectacular e aplaudida dera jornada, mès quauqui errors en contròl e era fluïdesa, li impediren de lutar peth pòdi e lo plaçaue ena 8ª posicion.
Es tecnics e jutges, Cristian Boiria e Marc Moga, e d'auti riders locals e de dehòra com eth suedés Reine Barkered vantauen enes hilats sociau e en programa Eth maitin d'Aran era linha deth rider aranés:
'Açò ei esquí de grana montanha damb trucs e accions com aguesta s'an de premiar'
Jokin Ruiz de Larramendi finalizèc 12au en esquí en sòn prumèr Mondiau, e en hemnes, Elisabet Marina, 6aua, quedèc sense opcions dempús de quèir ena recpecion d'un gran backflip.
En conjunt, eth Mondiau a supausat un gran succès entath freeride aranés, catalan e espanhòl, damb un 7au lòc ena classificacion per païsi ena que França guanhe er òr, Estat Units era plata e Canadà eth bronze.
Uns resultats istorics e fòrça esperançadors entath futur gràcies ath supòrt qu'era Real Federacion Espanhòla de Deportes de Invierno, RFEDI, balhe ad aguesta disciplina damb era creacion dera Copa de España Iberdrola de Freeride entàs joeni.
Ben Richards (NZL), que com era rèsta de public e riders aplaudic fòrça era baishada d'Abel Moga, se convertic en prumèr campion deth mon. Dusau siguec Ugo Troubat (FRA) e tresau Kai Jones (USA).
En hemnes guanhaue era polonesa Zuzana Withych, segona era canadenca Justine Dufour-Lapointe e tresaua era estatunidenca Molly Armanino