Primera Jornada de codina en Aran d'esturion e caviar

Marinats, vinagretes, pochats, carpaccios e rostits premaniren ua bona sòrta de receptes entà dar a conéisher as assistents ara jornada, era major part empresaris deth sector dera restauracion es nombroses possiblitats d'aguest peish enquia ara lèu desconeishut. Es caracteristiques culinàries der esturion e deth caviar e er hèt de que sigue un producte autòcton deth parçan e des aigües deth Garona a de contribuir segontes es professionaus dera restauracion a facilitar era introduccion d'aguest nau producte enes menus. Entà començar era comercializacion Caviar Nacarii a en aguesti moments 50.000 exemplars d'esturion de 5 grams a 12 quilòs. Es que ronden es 3 o 4 ans se destinen ara carn e es mès grani de 8 ans produiràn caviar. Un caviar que poirà meté-se ara venda en primauera. Eth pretz que se pagarà pera carn d'esturion virarà ath torn des 9 o 10 euros eth quilò, fòrça mès car serà eth caviar, que pot arénher es 600 o 700 euros eth quilò. Un pretz elevat, mès encara fòrça aluenhat deth que se pague per un quilò de caviar procedent deth mar Caspi, que se ven a 18.000 euros. Caviar Nacarii ei era dusau companhia espanhòla que se dedique ara produccion d'esturion dempús dera granadina Rio Tinto. Ben lèu començarà en Les tot eth procès de trasnsformacion der esturion, eviscerat, filetejat e ahumat, e en primauera er envasat deth caviar.