Sarabat d'Aran guerdonat damb eth Prèmi Lengua Viua 2026 pera sua trajectòria

Era 32aua Corsa Aran per sa Lengua tornèc a aumplir era plaça d'Aran en Vielha en defensa der usatge sociau der aranés
Jòse Badia Dominguez

Eth collectiu Lengua Viua tornaue a convertir era Val d'Aran en un gran espaci de reivindicacion lingüistica. Era 32aua Corsa Aran per sa Lengua amassèc aguest darrèr dimenge de junhsèga, a centenats de persones que, des de Les, Montgarri e eth Pòrt de Vielha, caminèren o correren entà deféner e hèr visible er aranés. Era jornada culminèc ena plaça d'Aran de Vielha damb ua crida a incrementar er usatge quotidian dera lengua e damb eth liurament deth Prèmi Lengua Viua 2026 ath grop Sarabat d'Aran.

Era lengua se hè caminant

Era jornada començaue fòrça d'ora. Es prumèrs caminaires emprenien eth camin deth Pòrt de Vielha, fòrça abans que se metessen en marcha era rèsta de gessudes. Mès tard s'ahigien es participaires que gessien de Pujòlo, de Montgarri concretament, autant es que caminauen coma es que voliern córrer e que remassauen as deth Terçon d'Aries e Garòs. E, ath madeish temps, en Quate Lòcs, ua auta colomna gessie de Les entà anar ahigent caminaires ath sòn pas pòbles des terçons de Lairissa, Marcatosa o Castiero.

Montgarri ei un des punts de gessuda dera corsa Aran per sa lenguaires en (Lengua Viua)

Coma cada an, era entrada conjunta ena plaça d'Aran des participants, fòrça d'eri damb era samarreta oficiau dessenhada per Maria Castet Delaurens jos eth lèma "Èm aranesi, parlam aranés", que sigueren arrecebudi per fòrça vesins e familhars, en ua jornada que torne a èster era màger mobilizacion annau en favor dera lengua aranesa.

"Parlar aranés ei responsabilitat de toti"

En parlament centrau, Lengua Viua tornèc a alertar dera situacion dera lengua. Er aranés ei era lengua abituau de mens deth vint per cent dera poblacion, maugrat qu'era majoria des aranesi l'entenen e lo saben liéger. Per açò reclamèren un pas endauant en sòn usatge sociau, fòrça especiaument enes relacions de cada dia.

Entara presidenta de Lengua Viua, Imma Caubet, mos trapam en un moment de maxima coneishença der aranés, mès er emplec sociau ei minim. E ahigie

Toti èm responsables dera sua superviuença, e de que milhore eth sòn estat sociau. Non agetz vergonha de parlar-lo. Sagetz-ac. Sonque atau, podem ajudar a revertir era situacion actuau

Tanben hec ua crida especiau as joeni que son eth futur dera lengua e deth país: "Vosati ètz qui l'auetz de possar damb mès fòrça. Auetz mecanismes e airines que pòden facilitar era difusion der aranés. Es naues tecnologies mos permeten un emplec der aranés que pòt arribar a quinsevolh part deth mon. Profitatz-les, pr'amor qu'er aranés a d'èster present tanben en aguest airau. Tota ajuda ei indispensabla tà qu'age present e, sustot, futur", afirmaue. 

 

era presidenta de Lengua Viua, Immaculada Caubet, ena lectura deth manifèst dera jornada

 

Sarabat, Prèmi Lengua Viua 2026

Un de moments dera jornada arribèc damb eth liurament deth Prèmi Lengua Viua, un reconeishement que, des de 1996, distinguís persones, collectius o institucions compromesi damb era defensa e era promocion der aranés.

Enguan eth guerdon siguec entath grop Sarabat d'Aran, en reconeishement ara sua trajectòria de mès de tres decades hènt musica en aranés. 

Es membres de Sarabat volgueren compartir eth guerdon damb totes es persones qu'an format part deth projècte. Enes sòns arregraïments destacaren eth trabalh de Lengua Viua en defensa der aranés, rebrembèren es musicians qu'an passat peth grop e arregraïren eth supòrt deth public. Tanben aueren paraules fòrça especiaus entath grop Nadau, que consideren ua des granes inspiracions entà estimar e víuer era lengua a trauès dera musica.

En acabar eth grop interpretèc era cançon "Aran per sa Lengua", creada en 2024 entà celebrar es trenta ans dera Corsa e inclodida en sòn tresau trabalh discografic 'Moria quin Sarabat'.

 

Nadau barrèc era hèsta dera lengua

Coma ja ei tradicion, eth grop occitan Nadau metec eth punt finau ara jornada damb un concèrt de cançons araneses e occitanes que convertic era plaça deth Conselh en ua grana celebracion dera cultura e dera lengua pròpies.

Damb era 32aua edicion dera Corsa, Lengua Viua tornaue a rebrembar qu'era milhor manèra de garantir eth futur der aranés ei emplegar-lo cada dia: en casa, ena escòla, en trabalh, en carrèr e, cada viatge mès, tanben en mon digitau.