Un uet competenciau obligue as ajuntaments aranesi a encargar informes de seguretat ath sector privat

Eth Conselh Generau d'Aran non emet es informes prescriptius de seguretat en activitats coma grani concèrts maugrat auer era competéncia directa d'ençà de 2023. Era maxima institucion aranesa admet que pendent tot aguest temps a existit un uet competenciau que, ara, ja ei en vies de solucionar-se. Mentretant, es Ajuntaments an de recórrer a entitats collaboradores dera Administracion entà poder arténher aguesti informes obligatòris.

Aguest tipe d'informes, -coma mèrque era lei 3/2010 de prevencion e seguretat matèria d'incendis en establiments, activitats, infraestructures e edificis- son indispensables entà autorizar determinades activitats, coma era organizacion de concèrts damb mès de 500 assistents, pr'amor que servissen entà avalorar es risqui d'incendi e validar es mesures de seguretat. 

Enquiath traspàs competenciau, era sua elaboracion ère responsabilitat des Bombers dera Generalitat, mès, d'ençà deth traspàs dera competéncia d'emergéncies e proteccion civila aguesta responsabilitat demore en mans des Pompièrs d'Aran.

Era situacion siguec denonciada per Convergéncia Aranesa en darrèr plen deth Conselh Generau. Eth conselhèr dera oposicion, Sisco Rodríguez Berart, avertic que, quan es ajuntaments solliciten aguesti informes, "non receben cap de responsa" per part dera administracion aranesa, mentre que des dera Generalitat se les comunique qu'aguesta competéncia ja non les correspon.

Deuant d'aguest scenari, es ajuntaments an optat per recórrer a entitats collaboradores dera Administracion. Se tracte d'empreses privades previstes ena madeisha lei, qu'an artenhut ua autorizacion dera Generalitat e qu'actuen enes prètzhèts d'emission d'informes tecnics, certificacions e actes de verificacion o contròl en encastre dera prevencion e era seguretat en matèria d'incendis. Totun, des dera oposicion considèren qu'aguesta solucion "non ei era mès adienta, sustot pes implicacions en matèria de responsabilitat e seguretat".

Era sindica d'Aran, Maria Vergés, reconeishec era problematica e atribuïc eth retard ara manca de concrecion en traspàs de competéncies per part dera Generalitat. Vergés assegure que ja s'a format a personau des Pompièrs d'Aran entà assumir aguesta foncion e defensec que recórrer a empreses extèrnes ei tanben ua via totaument valida: 

Ei quauquarren que s'auesse agut d'aclarir en moment deth traspàs. Non ei de rebut assumir traspassi des que ne desconeishem eth sòn desplegament

Un des exemples mès recents d'aguesta problematica a estat er hestau musicau Polar Sound, celebrat era darrèra dimenjada, que congreguèc a milèrs de persones.