Ara lum dera Candelèra

Eth 2 de hereuèr se celèbre era Candelèra.  Ath torn d'aguesta data i a fòrça dites e tanben tradicions. Era mès recenta, ei era hèsta catolica de benediccion des candeles.

Eth Musèu dera Val d'Aran a organizat un talhèr entà saber quauquarren mès sus era hèsta e apréner a hèr candeles.

Júlia Carreras,  divulgadora culturau explique as assistents es orígens dera Candelèra , com ua hèsta estacada damb eth cicle agrari. "Ei eth moment en que er iuèrn ja va ara baisha, pugen es ores de solei  e i a mès lum, senhau que s'apròpe una naua sason ".

 Entara  religion catolica, eth 2 de hereuèr , 40 dies dempús de Nadau, se celèbre era presentacion de Jesús en temple . Entà rebrembà'c se beneïssen es candeles que son simbèu de lum. Era tradicion s'a mantengut ath long des segles, e es candeles beneïdes se hègen a servir en moments especiaus.

Ena tradicion cristiana popular se beneïen candeles que dempús se hègen a servir en moments difícils enes larèrs, de dolentes cuelhetes, de granes desgràcies, malauties o moments de incertesa sociau

Aué en dia , auer candeles beneïdes enes cases ja non ei tant abituau, ara  se  hèn servir com objèctes ornamentaus. 

En talhèr organizat peth Musèu dera Val d'Aran sonque se  hèn a servir materiaus naturaus:  Un panèu de cera d'abelha, e un cordon de coton, entà hèr era candela ;  e entar ornament pinhes, èrbes aromatiques,petites branques, crospa  e huelhes de arbes, frutes seques , còrdes o lacets de colors.

Er hèt qu' era lum sigue de cera d'abelha a un component de proteccion extra e de noblesa, perque ei ua lum cara... Enes cases normaument se hège a servir era lum d'òli de carbur. Era cera d'abelha ei quauquarren que se hè a servir en moments fòrça especifics

Eth procès d' elaboracion ei fòrça senzilh. Prumèr s'a  de  cahuar damb es mans era placa de cera d'abelha, entà que se pogue trebalhar milhor e non se trinque. Ara seguida se place en un extrem ,eth cordon  de coton , e en ua superficie planèra se hè a  rodar enquia formar  un cilindre. Un còp prèsta se met sus era basa de husta. 

Entath següent pas, sonque cau un shinhau de imaginacion e ua dòsi d'adretia entà combinar toti es materiaus. Materiaus naturaus, restacadi ara tèrra que rebremben es orígens dera hèsta e era lum dera candela, era tradicion religiosa dera Candelèra .