Carrèr a carrèr

Era dusau fasa deth projècte "Carrèr a carrèr" der ajuntament de Vielha ei en marcha . Hè dejà 15 dies qu' es mashines, invadissen es viaus d'ua bona part deth pòble.

Carrèrs talhadi e desviaments provisionaus de trànsit entà poder hèr es trebalhs de fresat e engondronat d'un detzenat de carrèrs, lèu 5 quilomètres e miei , era major part des quaus se trapen en airau dera solana, en marge dret dera Garona.

Entar alcalde de Vielha, Juan Antonio Serrano, aguesti trebalhs son fòrça de besonh, en uns carrèrs enes que non s'a hèt cap d'inversion enes darrèri 20 ans

Çò que hèm ei milhorar es carrèrs d'ua manèra importanta. Auem metut 1 milion 200 mil euros , en aguesta licitacion e entar an que ven auem previst ua auta intervencion ena que se priorizaran es trepaders

Eth condicionament des carrèrs coincidís  damb er acabament dera urbanizacion de dues places:  era plaça Comets , que ja s'a daurit ath public  ,  e era plaça còto Marzo, que ei previst que sigue presta bèn lèu . Tanben se daurirà per complèt era connexion damb eth nau airau ath torn deth cementèri.

Eth projècte de reforma dera plaça dera glèisa ei acabat e es òbres poirien començar enguan. Çò qu'aurà de demorar ei era urbanizacion dera plaça Espanha, perque era reforma vò reordenar tanben er espaci dera hònt e eth pònt sus er arriu Nere.

Çò que òc que s'harà ei engondronar era plaça actuau, aprofitant qu'es mashines an d'entrar en carrèr Arnals.

"Carrèr a carrèr" compde damb ua inversion totau de mès de 2 milions d'euros.