Casau on line, entà persones granes

Pilar Peremartí, viu en Bossòst , e ei ua des usatgères deth Casau on line, ua iniciatiua que a metut en marcha er airau de Servicis Assistenciaus Integradi  d'Aran.

Com explique era directora Eugenia López,  ei adreçada a persones que son en situacion d' isolament, que per manca d'autonomia fisica, demoren en casa e an trincat eth sòn hilat de relacions sociaus.

Son persones damb ua edat auançada, e çò que volem ei sajar que mantenguen relacions, e a trauèrs d'aguesta tecnologia, que mos semblèc qu'ère un sistèma facil entàs persones granes, se podessen connectar e de bèra forma auer relacion damb d'autes persones e participar d'activitats guidades pes professionaus 

Ei per aquerò , que cada deluns, dimèrcles e diuendres, entà meddia,  ei  prèsta deuant deth televisor entà connectar-se via internet damb era professionau qu'impartís cadua des activitats.

Eth diuendres  tòque hèr un shinhau d' exercici fisic. Era terapeuta ocupacionau, Bea Pozo, dirigís a distància es exercicis que les an de servir entà milhorar era mobilitat, e mantíer ua bona forma fisica.

Actuaument , son 7 hemnes es usatgères deth casau.  Entà totes eres, era experiéncia ei positiva:  les ajude a afrontar milhor eth sòn dia a dia e ath delà les apòrte un benefici fisic, mès tanben mentau,  com mos explique Pilar Peremartí:

Es dies que mòs tòque les demori perque ei com se siguessa dehòra de casa, damb d'auta gent e d'autes formes de pensar

Diferenti perfils professionaus:  ua educadora sociau, especializada en gent grana,  era terapeuta ocupacionau, era  psicologa, e era integradora sociau ,  organizen es activitats en tot atíer es preferéncies des usatgères, ac detalhe Gemma Martín, coordinadora deth Servici d'atencion domiciliària .

Cambiam es tèmes en foncion des sòns interèssi...Talhèrs de codina, d'educacion fisica, de mobilitat, tanben d'estimulacion cognitiva, a trauèrs de jòcs e activitats diuèrses

Entà formar part deth casau on line, sonque ei de besonh d' auer television e conexion a internet.Eth Airau de Servicis Sociaus s'encuede dera installacion des aparelhs que hèn possible era conexion.

Eth madeish programa permet as usatgèrs/ères  que volguen, connectar-se dus dies mès ,a trauèrs dera entitat SOARA a casaus que se hèn en diferenti punts de Catalunya.