Cens deth paom e seguiment deth gahús petit e era perditz blanca

Eth paom, ei ua espècie menaçada  en perilh d'extincion, per aquerò de manèra periodica se hè eth recompde des sues populacions. Es agents de miei ambient deth Conselh Generau d'Aran ,com cada an, an hèt eth recorrut pes cantaders entà compdar  es mascles e conéisher era evolucion dera populacion, com explique eth responsable de miei naturau deth Conselh Generau d'Aran Ivan Afonso, 

 S'an hèt censi globaus en 2015 e 2025, e dempús censi parciaus cada an e çò que veiguem ,  ei qu'eth nombre de paoms e pauesses  baishe , ath torn d' un 3% cada an

Eth cambi climatic, mès sustot era preséncia de depredadors , com era agla daurada, er esparvèr perdiguèr , era marta e era hagina,  tanben condicionen era preservacion deth paom , per aquerò se sagen d'aplicar mesures , com era captura , de quauques entà reduir es afectacions.

Eth mes de mai ei un des mès sensibles . I a mès mobilitat des mascles e es femelhes ath torn des cantaders. Era preséncia umana en bòsc tanben afècte es nins

Era sason des misharnons de primauera  tanben ei problematica. Fòrça viatges peth pas des misharnonaires, es pauesses pòden acabar  abandonant eth nin , en tot dificultar era fecundacion des ueus

Segons es agents ruraus  de Territòri dera Generalitat, es donades non son guaire optimistes. 

En 2025 se hec eth cens globau deth paom en Catalunya a compdar des mascles detectadi enes cantaders. Es resultats confirmen era tendéncia negatiua des darrèrs censi: sonque queden uns 245 mascles, çò que supause ua reduccion deth 58% des exemplars enes darrèri 20 ans , e se calcule qu' an ua probabilitat d'extincion de mès deth 50% enes propèrs 40 ans se non se reduïssen es sues menaces.

Ath delà deth contròtle e  eth seguiment des populacions de paom, des deth departament de miei naturau deth Conselh Generau d'Aran  tanben se hè eth seguiment de d'autes espècies, damb era tecnica dera Bioacustica .

Eth placament de detectors acustics, permetec d'identificar  a trauèrs deth cant ,eth gahús petit. Ara es tecnics e es agents de miei ambient an plaçat mès aparelhs en bòsc, e tanben de forma experimentau en parçans de nauta montanha, entà enregistrar era preséncia dera perditz blanca. En un futur ath delà,  se poiran quantificar es exemplars, quan era tecnologia permete diferenciar eth son de cadun des audèths.