Er aranés serà prioritari entà estabilizar es docents ena Val d'Aran

Educacion refòrce eth papèr der aranés enes escòles e instituts dera Val d'Aran. A compdar deth cors que ven, se harà a prevàler era coneishença der aranés per dessús dera posicion ena borsa de trabalh entà assignar es places des mèstres e professors. Se tracte d'ua mesura entà estabilizar eth personau en territòri e redusir era grana mobilitat de docents que i a ara.

Actuauments, segontes es donades deth Departament, mès deth 50% des docents d'Aran ja dispòsen deth nivèu C1 d'aranés, eth maxim que se pòt arténher ena nòsta lengua. 
 

Corregir situacions injustes

Enquia ara, fòrça professors arriben ena Val d'Aran sense coneishements der idiòma e l'aprenen pòc a pòc. Mès açò provocaue situacions injustes entad aqueri que començauen a apréner era lengua. Pr'amor que quan acabaue eth cors, se trobauen que se les assignaue ua plaça dehòra dera Val, perqué arribaue quauquarrés damb mès punts ena borsa, mès sense cap de tipe de coneishement sus era lengua pròpria d'Aran. A compdar deth cors que ven, açò se vò corregir. 

"Totes es convocatòries e toti es concorsi entà provedir places gesseràn damb era exigéncia deth C1", explique era directora des servicis territoriaus d'Educacion en Pirenèu e Aran, Carlota Valls. Totun, entà corregir aguestes situacions s'incorpòre ua nauetat: 

se ua plaça non se corbís perqué non auem personal que pugue acredir aguest nivèu, auran prioritat aqueri qu'agen acreditada era lengua, encara que sigue en nivèus inferiors".

Açò servirà "entà corregir situacions en qué auie de marchar un professor que portaue 2 o 3 ans ací, non auie assolit eth nivèu C1, encara qu'auie un cèrt nivèu e anaua auançant e, totun, l'auíem de substituir per quauquarrés qu'auie mès nòta ena borsa mès que jamès auie trabalhat en Aran", soslinhe. 

A compdar deth cors que ven

Segontes Carlota Valls, era mesura encara non ei aprovada, mès ja compde damb eth vist-e-platz deth Director Generau de Personal Docent dera Generalitat, atau coma dera madeisha conselhèra d'Educacion, Esther Niubó e s'implementarie a compdar deth cors 2026-2027. 

Ua mesura, ath delà, qu'a estat plan ben recebuda peth govèrn aranés. "Ei fòrça important, perqué mos costaue estabilizar eth personau docent en Aran. Ara poderà demorar tota era gent qu'a interès per viuer en ací e apréner era nòsta lengua", valore era conselhèra de Coneishement, Angelina Cases.