Era Constitucion Espanhòla estree version en aranés: "Ei ua hita tàs lengües minoritàries"

Aguesta ère era unica lengua oficiau en Estat qu'encara non auie era sua version dera Carta Magna
Sofia Cabanes Balanzà

Eth Bulletin Oficiau der Estat (BOE) a publicat era prumèra edicion dera Constitucion Espanhòla en aranés. Aguesta ère era unica lengua damb estatus d'oficialitat en Estat qu'encara non auie era sua version dera Carta Magna. L'a tradusida era Academia Aranesa dera Lengua Occitana. 

Es prumèrs exemplars en papèr d'aguesta version dera Constitucion ja an arribat ena Val d'Aran. Se tracte d'ua edicion bilingua castelhan – aranés e incorpòre era version mès actualizada dera Carta Magna, damb era darrèra modificacion aprovada en mai de 2026 sus era representacion des Isles d'Eivissa e Formentera en Senat.
 

Jusèp-Lois Sans n'a hèt era traduccion revisada e autorizada pera Acadèmia Aranesa dera Lengua Occitana (Sofia Cabanes)

Ua version signada pera Academia Aranesa

Se tracte d'ua traduccion autorizada e academica, aprovada e revisada pera Acadèmia Aranesa dera Lengua Occitana (IEA-AALO). Totun, qui a realizat bona part d'aguest trabalh a estat Jusèp-Lois Sans, membre dera seccion aranesa d'aguesta acadèmia:

Pensam qu'ei ua hita importanta entàs lengües minoritàries de tot eth món

Er aranés ei oficiau en Catalonha dempús de hè 20 ans, gràcies ara aprobacion deth nau Estatut d'Autonomia de Catalonha de 2006. Totun, era nòsta lengua encara non disposaue d'ua version pròpria e autorizada dera Carta Magna coma òc que l'an eth catalan, er euscar eth galhec. 

Segontes, Jusèp-Lois Sans, era revirada "a estat un procès long e laboriós" que comencèc ara hè un an. Dempús d'ua prumèra traduccion, eth sòn trabalh passèc per un estricte procès de revision e debat en sen dera Acadèmia Aranesa. "A estat eth prumèr còp que seguim un procediment d'aguestes caracteristiques damb un document juridic. Encara que ja auem experiéncia ena revirada des leis que s'apròven en Parlament de Catalonha", afirme.

Aguesta edicion incorpòre era version mès actualizada dera Constitucion, damb era darrèra modificacion de mai de 2026 (Sofia Cabanes)

 

Er Institut d'Estudis Aranesi - Academia Aranesa dera Lengua Occitana ei era autoritat lingüistica dera varianta aranesa dera lengua occitana. "Entà nosati aguest a estat un auanç important ena reconeishença der aranés". "Ara era Constitucion en occitan poirà figurar enes espacis mès importants der Estat, coma son era Casa Reiau, eth Govèrn, es ministèris,... Incorporam era nòsta lengua e la plaçam ath madeish nivèu qu'es autes", soslinhe Jusèp-Lois Sans. 



Era Constitucion en aranés se pòt consultar e descargar gratuïtaments ena web deth BOE. Aquiu tanben se'n pòt crompar era version en papèr per 6 èuros.