Era Val d'Aran acuelh era tresau edicion der hestivau TerSon
Era Val d'Aran se premamís tà celebrar eth pròxim 17 de junh, ua naua edicion dera Hèsta d'Aran. Ath delà des actes pròpis deth dia d'Aran era celebracion se complète damb un programa que includís activitats culturaus, musicaus, educatives e gastronòmiques acorropades en hestivau TerSon, eth Son dera Tèrra, qu'arribe ena tresau edicion.
Era programacion començarà diuendres 12 de junh e s'alongarà enquiath dimèrcles 17 dia dera Hèsta d'Aran damb es activitats vinculades ar hestivau TerSon, qu'impulse eth Conselh Generau tà reforçar era cultura e era música de casa nòsta.
Programacion variada. Era Clika
Era prumèra e dilhèu ua des cites destacades, serà damb era dusau edicion dera cantata en aranès protagonizada pes alumnes des centres educatius d'Aran e eth grop infantil La Clika.
Er objectiu, com passèc estan passat, ei fomentar er usatge social der aranès entre es mès joeni e en aguest cas hèc a trauèrs dera musica. Enguan, era cantant solista qu'acompanharà as interprèts d'era Clika ei era aranesa Marina Cuito, a qui coneishem pes sues adaptacions ar aranés de cançons de disney.
Ena dusau edicion d'era Clika en aranés auram 11 tèmes e d'aguesti, dus que son naui.
AranVision
Ena programacion der hestivau TerSon, qu'auram tanben era dusau edicion d'AranVision, un concurs de cançons en aranès, ja siguen versions o cançons originaus, qu'ei organitzat pera Associacion Cultural Arania Val d'Aran.
Enguan tornaran a auer 24 participants qu'an trabalhat ath long des darrèrs mesi en ua edicion ena qu'auram dus representants en apartat de cançon inedita infantil en aranés.
Es guanhadors der an passat tanben partciparan der espectacle mès sense competir. Ath delà tanben auram es concèrts damb eth grop aranés Sarabat, es aragonesi Bosnerau e es catalans dera Orquestrina Trama.
Prèmis literaris e gastronomia
Terson tanben acuelherà eth liurament des prèmis literaris Mossen Condò Sambeat, er Aran de literatura e es concursi de cuermetratge ede TicTòc que s'haràn eth deluns 15 ena glèisa de Mijaran.
Eth dia dera Hèsta d'Aran, eth 17 de junh, arribaràn es actes institucionals damb era recepcion e desfilada des pendons en representacion des pòbles e des terçons enquiath santuari de Nòstra Senhora de Mijaran a on s'harà era missa solemne, es parlaments oficiaus, eth liurament deth Prèmi 17 de junh e era actuacion des còlhes de dances.
E tanben torne GustAran. Ua propòsta gastronomica qu'auec ua tan plan bona acuelhuda ena prumèra edicion e que tornarà a amassar establiments de restauracion e productors locaus tà mostrar era evolucion dera codina aranesa.
Entath govèrn aranès, era hèsta a hèt ua evolucion pr'amor qu'a passat de un dia, eth dera hèsta d'Aran propiament dit, a hèr activitats que s'alonguen pendent diuèrsi dies.