Estèra entà cahuar bastisses e equipaments municipaus

Naut Aran a estreat aguest iuèrn en Salardú , eth "district heating", er hilat de distribucion de cahuatge urban

Jovita Ané-Josep Manel Vera

Ath dejós dera aubèrja era Garona de Salardú, e a pè dera carretèra C-28 se lheue ua naua bastissa que embarre eth depòsit de magazematge d'estèra  e era sala de caudères deth district-heating ( hilat de distribucion de cahuatge urban ) de Salardú , que entrèc en foncionament a finaus deth mes de noveme.

Exterior dera bastissa de caudères e depòsit d'estèra en Salardú (3catinfo)

Dues caudères  de 800 e 400 quilowats  son es que cahuen er aigua que s'acantière en dus depòsits a on se mantén a uns 70 grads. D'aquiu e de forma totaument automatizada, se hè arribar a trauèrs der hilat de cahuatge enes bastisses e equipaments que i son connectadi.

Sala de caudères district-heating en Salardú (3catinfo)

 

 

De moment aguest iuèrn  ja s'an cahuat damb etn nau sistèma , mès eficient  -perque supause un estauvi important-, era rampa calefactada d'accès ath pòble , ath cant dera escòla, eth poliesportiu e era sala sociau. Enes prop lèu mesi s'acabaran es trebalhs entà connectar era bastissa der ajuntament, e aguest estiu s'amiarà a tèrme era conexion damb era piscina.


Eth dessenh dera installacion permetera connectar en un futur es equipaments deth centre civic e sociau que s'a de bastir en airau deth parcatge public, com explique er alcalde de Naut Aran, César Ruiz-Canela 

 

 Nosati auem pensat en dues caudères , perque se bèth dia se n'espatle ua , tostemp auram er auta de supòrt , ath delà era nòsta despena de energia ei diferenta  en  iuèrn e en estiu, en que se reduís ath cahuatge dera aigua  dera piscina. En cambi en iuèrn , cau cahuar mès causes , naui carrèrs, rampes calefactades... per aquerò auem sobredimensionat era installacion per se bèth dia mos cau ampliar

 

Eth district -heating de Salardú, ei eth prumèr que i a en Aran, ua apòsta pera sostenibilitat e era eficiéncia energetica, que a comportat ua inversion de 1 milion 400 mil euros, des quaus 738 mil an estat finançats per hons Europeus Next Generation.


De moment era estèra se crompe en un centre de Bossòst, ara demora que entre en foncionament eth centre logistic de Les  a on se harà era transformacion dera husta que se trèigue des bòsqui aranesi.