Eth gondron gravat, eth nau empeirat des carrèrs ?

Vilamòs, ei eth prumèr pòble d'Aran que sage aguesta tecnica innovadora , ua pròva pilòt entà avalorar era resisténcia e era durabilitat deth paviment as dures condicions iuernaus

Jovita Ané e Josep Manel Vera

Es mashines an aucupat es darrères setmanes eth centre de Vilamòs. Era plaça Major e era plaça dera glèisa an estat talhades ath trànsit. Se i an hèt trebalhs de renauiment deth paviment. A diferéncia de çò qu' èm acostumadi a veir ath laguens des nòsti pòbles,  ací s'amie a tèrme ua tecnica innovadora: ei er engondronat gravat o imprimit.

 

Operaris trebalhant en nau paviment en Vilamòs (3catinfo)


Dempús d' auer estienut  ua cocha de gondron, ua mashina torne a cahuar era superficie, a on es operaris van plaçant ua plantilha de carrèus . Ua auta mashina intervén com ua premsa de 400 quilòs que  dèishe gravat sus eth tèrra caud ,eth diboish que represente un empeirat. 

Detalh dera mashina e era plantilha entà imprimir es carrèus en gondron

En totau s'actue sus dus trams que somen uns 600 mètres quarrats. Un trebalhs que s'es condicions meteorologiques son avientes , se pòt hèr en pòc mès d' ua setmana,  a diferéncia dera manèra  mès  tradicionau deth plaçament d'un empeirat, damb era  que  es madeishi trebalhs se pòden alongar  de 3 a 4 setmanes. 

 

Detalh deth carrèr damb era tecnica deth gondron grabat (3catinfo)

Er acabat finau s'a hèt  damb ua pintura especiau,  damb un color  armonic damb er entorn, com ac explique er alcalde ,Oriol Sala

Era pintura , ath delà de baishar era tonalitat, çò que hè, ei dar-li durabilitat ath paviment. Atau evitam que i age filtracions d'aigua, e que es madeishes arròdes des coches trenquen eth gravat dera cauçada. Pensam tanben qu'ei milhor un color mès clar, "eth gris", que non eth nere intens, deth gondron

Eth gondron imprimit, se hè a servir en fòrça lòcs, damb diboishi e colors ben  diferenti, sustot en ciutats, a on es iuèrns non son tant extrems. Ei per aquerò, qu' aguesta tecnica , que ei nauedosa en Aran, non dèishe d' èster ua pròva pilòt, entà veir com respón as dures condicions iuernaus.

Calerà veir com s'adapte, ar iuèrn, ara sau, e as mashines de trèir era nhèu,  e se vedem qu'ei un sistèma exitós, le trasladaram enta d'auti carrèrs, autant en Vilamòs com  Era Bordeta 

Era actuacion en centre deth pòble ,  prevee tanbe eth plaçament d'un  semàfor que regularà eth pas alternatiu en carrèr mès estret, qu' ei pas obligat entà anar tà Arres , e era abilitacion de passi entas persones. Tot entà milhorar era seguretat e era mobilitat des vesins e visitants ,sustot enes sasons de major afluéncia toristica