Incendi en un edifici de Vaquèira obligue a evacuar 29 persones

Deluns 30 de març, tàs 7 deth maitin, era Sala de Contròtle des Pompièrs d'Aran recebie un avís a trauès deth telefon 112 informant d'un incendi en edifici Saumet de Vaquèira.

Eth huec s'originaue, semble, en un quadre electric d'un apartament dera tresau planta, qu'a demorat parciaument afectat. Ath delà, cinc apartaments mès an patit afectacions de mens intensitat.

En dispositiu d'emergéncia i an intervingut 23 efectius deth Còs de Pompièrs d'Aran, damb 2 veïculs d'aigua, un veïcul autoescala, 5 veïculs leugèrs e ua ambulància. Tanben s'i an desplaçat 3 veïculs des Bombers dera Generalitat de Catalonha, 2 veïculs des Sapeurs-Pompièrs deth SDIS 31, 2 ambulàncies deth SEM, atau coma efectius des Mossos d'Esquadra e personau assistenciau d'Aran Salut.

Pendent er incident, s'an evacuat a 29 persones, que s'auien confinat en diferents apartaments der edifici qu'an estat avalorades pes servicis sanitaris sense patir maus.

Dempús d'assegurar era estructura dera bastissa, es pompièrs an autorizat eth retorn des vesins as apartaments non afectadi. En çò que tanh as persones des abitages afectadi, bères ues an estat relotjades en establiments otelèrs e d'auti an tornat tara sua residéncia dehòra dera Val d'Aran.