Les projècte un centre d'innovacion tecnologica en Matacabòs

Dempús de 15 ans barrat, er Ajuntament de Les, en Baish Aran, projècte redaurir era antiga Aubèrja de Matacabòs entà reconvertir-la en un Centre d'Innovacion Tecnologica transtermièra que pogue proporcionar tanben lotjament as sòns usatgèrs. 

Aguest ei un des principaus projèctes qu'eth Govèrn municipau prevé impulsar en aguesta rècta finau de legislatura, dempús qu'en aguest espaci s'agen amiat òbres per valor de 340.000 euròs entà milhorar era eficiéncia energetica dera bastissa. 

Dempús des ans 60, Matacabòs auie acuelhut activitats entàs joeni deth pòble, colònies e, enes darrèri ans, auie proporcionat tanben lotjament a trabalhadors de sason. An estat diuèrses es opcions que eth consistòri a estudiat entà redaurir-la, entre eres, es usatges toristics, mès fin finau, "s'apostarà per un projècte innovador", afirme eth baile, Andreu Cortés.  E ei qu'er Ajuntament vò profitar era proximitat damb Tolosa entà aufrir un espaci a on se poguen impulsar projèctes tecnologics o crear enterpreses.

A 150 km auem ua capital europèa damb un potenciau economic enorme. Enes darrèri 15 ans Tolosa a experimentat un des creishements economics mès importants dera zòna euro. E ac volem profitar

Coworkin e coliving

Aguest espaci se coordinarie damb er Hèpic Hub dera Val d'Aran e se completarie damb eth coworking public Vielha, qu'ara ja a totes es sues places aucupades, damb er avantatge que tanben poderie aufrir lotjament. "Poder captar persones que volguen fixar era seua empresa o centre de trabalh aciu e enes abitacions qu'abans formauen part dera aubèrja haríem petits apartaments, de manèra que aportaríem ua aufèrta de coworking e de coliving que se complementarie", explique eth baile. 

Amassa damb era anciana Aubèrja, er Ajuntament trabalhe tanben entà reformar en un futur er edifici InfoLes, plaçat en poligon d'Escamon. De hèt, aguesta bastissa acuelherie era activitat professionau e de coworking e Matacabòs es activitats pròpries deth Centre d'Innovacion Tecnologica.

Entà poder amiar entà deuant aguest projècte eth consistòri a demanat ua subvencion ath Ministeri entara Transicion Ecologica e Rèpte Demogràfic e ua consultoria trebalhe dejà entà presentar un projècte de dinamizacion entad aguest futur centre d'innovacion plaçat en Matacabòs.