Pas endauant entath bastiment d'abitatge sociau en Vielha
Pas endauant important entath bastiment en Vielha d'aumens ua seishantia d'abitatges de loguer sociau. Er Ajuntament a formalizat un convèni damb era Agéncia der Abitatge de Catalonha que permeterà daurir era licitacion aguest madeish mes d'abriu. Ei previst qu'en junhsèga ja i pogue auer un promotor assignat.
Se tracte dera finca de titularitat municipau "Tuca Tressents", que se place en Betren. Ei eth terren qu'er Ajuntament presentèc ara convocatòria dera Generalitat entara resèrva de solèr public, çò que se coneish coma eth 'Pla 50.000' deth Govèrn de Salvador Illa, entara construccion d'abitatges de proteccion oficiau.
Aguest ei un terren de 5.260m2, ath cant der Otèl Tuca a on s'i poirien bastir entre 60 e 80 pisi. Entath baile de Vielha, Juan Antonio Serrano, aguest qu'a estat un pas tan plan important entà méter solucion ara problematica der abitatge en Aran:
Sò fòrça content perqué aguestes mès de 60 viuendes seràn ua realitat relativament lèu.
A compdar d'aguest convèni, er ajuntament cedís era gestion deth terren ara Generalitat pendent 75 ans a trauèrs dera Agéncia der Abitatge de Catalonha, qu'aurà era potestat entà convocar un concors public entà que se pogue licitar eth bastiment d'aguestes viuendes en tot escuélher un promotor. Precisament se li cedís eth dret sus era superficia, de franc, ara Agéncia entà que pogue cedir-lo a un tresau.
Vielha forme part deth darrèr grop de 31 municipis qu'an signat eth madeish convèni damb era Generalitat. E, de toti aguesti, ei eth municipi qu'a aufrit un terren mès gran: "Aciu tanben auem petiti solars, mès, pes nòsti condicionants, non resulten economicament rendables entàs promotors", ahig eth baile.
Era oposicion, a favor
Aguesta siguec ua iniciatiua plan ben recebuda pera oposicion, que i votèc a favor. Totun, Convergéncia Aranesa critique que non s'age hèt abans ua iniciatiua d'aguest tipe. "Èm contenti, pr'amor qu'ei un ahèr qu'auem reivindicat tostemps. Hè temps mos didien qu'ère impossible e ara, de patac, se poden hèr mès de seishanta pisi", exprimís eth sòn portavotz, Enric Jiménez.
Deth sòn costat, Aran Amassa tanben recep positiuament eth projècte. Segontes era còsso Ruth Barella "ei fòrça important tath municipi de Vielha e Mijaran, sustot entà qu'era gent deth territòri pogue auer ua viuenda digna".