Pòrta a pòrta: Era remassada des residus urbans a grani productors complís un an
Jovita Ané e Josep Manel Vera
Es mesi de junh e junhsèga son es mesi de crubament dera taxa deth servici de remassada e tractament des lordères. Es abitatges pagaràn eth rebut annau, mès es grani productors receberan en aguest periòde dus rebuts. Un correspon ara part fixa der impòst deth 2026, qu'ei eth 60% deth totau , que se pague en an vigent. Er aute rebut , ei era part variabla: eth 40% bonificable der an 2025.
Aguesta ei ua des caracteristiques dera naua ordenança fiscau, qu'ei estacada damb era remassada selectiua pòrta a pòrta a grani productors, e qu' a com objectiu incentivar eth reciclatge des residus.
Mès com se calcule, era part variabla? Atau ac explique, Laura Puig , era tecnica informadora de residus deth Conselh Generau d'Aran qu' a visitat toti es establiments un an dempús deth nau modèu de remassada pòrta a pòrta.
Era part variabla ( 40% deth rebut) se dividís en dues parts: Eth 50% ges deth numerò d'incidéncies que i a agut damb eth servici, pendent tot er an 2025, especiaument barreges de residus. Se non se supèren es 30 incidéncies era reduccion ei aplicabla.
Eth 50% restant depén dera fraccion rèsta deth tot eth volum . Entà que i pogue auer bonificacion, non a de superar eth 10% des residus der establiment
Atau, en milhor des cassi , es grani productors se ac hèn ben , pòden arribar a estauviar-se eth 40% der impòrt totau deth rebut.
Çò que se sage, ei d'anar premiant a toti es usatgèrs qu' ac hèsquen milhor
Mihaela Naumov , d'ua cafeteria de Vielha reconeish, que vau era pena er esfòrç .
Ath començament semble complicat, mès non ei dificil de hè'c , e se ath delà te bonifiquen ,hè'c ben, vau molt era pena
Era mesura penalice ara, e en un futur, as que incomplisquen era normatiua, com rebrembe Oriol Sala, conselhèr de gestion ambientau deth Conselh Generau d'Aran
Atau ac ditz era Lei 7/2022 qu'ac cite textuaument dera Union Europèa:
Qui contamine, pague, e per tant ,en aquera linha vam a seguir trebalhant
Quan eth pòrta a pòrta sigue consolidat entre es grani productors se poderie implantar era remassada enes abitatges. Era normatiua europèa determine que en 2030 s'a d'auer artenhut eth 60% deth reciclatge des residus que se produissen en Aran