Prumèrs vòls damb dròns de carga , mès enlà dera vision deth pilòt , en Aran

Porcingles, en municipi de Canejan a estat eth lòc escuelhut entà hèr un des prumèrs vòls damb un dròn de carga  que pòt hèr trajèctes mès enlà dera vision  dirècta deth pilòt. 

Era empresa d'Arres, Pirineos Drone, ei era prumèra que a eth permís dera Agéncia Estatau de Seguretat Aèria entà operar damb aguest tipe d'aeronau. Daniel Castet , n'ei eth fondador , e cap de pilòts.

Açò mos permet operar enquia  un màxim de 4 quilomètres s'auessem  de besonh. Tà poder realizar aguesti servicis cau hèr un estudi de seguretat fòrça important. Cau auer en compde a on s'impartissen e quina ei era densitat poblacionau que i a baish. Per çò que hè  ara seguretat en aire compòrte ua sèrie de coordinacions e uns sistèmes que a de portar eth dròn tà poder èster identificat 

En aguest prumèr servici transportaran sacs de sau entath bestiar que pèish ena cabana deth Cap dels Malhs en Canejan. Ua operacion que reduís en mès de 40 menutes eth temps que calerie se s'auesse de hèr aguesta distància a pè.

Era prevision ei que enes pròplèu mesi se hèsquen 100 vòls entà lòcs de difícil accés:  eth tuc deth Dossau, era Bassa d'Arres, Era Artiga de Lin, Porcingles e es entorns de Garòs.

Uns trajèctes entà dar supòrt ara ramaderia, entà portar subministrament as refugis de montanha o materiau entath manteniment des hilats de telecomunicacions.

Entà Guilhèm Piris, responsable d'innovacion deth Conselh Generau d'Aran,  ei ua pròva pilòt, mès ,se resòlen besonhs reaus.

No vam a  volar per volar, senon que estam hènt un servici. Era empresa està prestant un servici de transpòrt aeri per miei de  dròn. Nosati calculam que seran aguesti mesi e dempús,  çò de mès ideau serie que aguest dròn podesse operar com quausevolh aute servici, que auinsevolha persona que n'age besonh , pogue contractar ara empresa entà hèr aguesti vòls. Persona, administracion o empresa privada

 

Es 100 vols programadi , permeteran estudiar mès pregondament es mecanismes mès efectius entà superar eth rèpte dera orografia des montanhes e era manca de connectivitat , entà poder milhorar atau, ena logistica de transpòrt de carga damb dròns.

E com ditz, Daniel Castet de Pirineos Dron,

Çò que cau ei familiarizar-mos damb eth dròn, campar quines son es sues caracteristiques , campar eth percentatge de temps de bateria, e damb aquerò anar ajustant, era nautada , era velocitat e es tempsi. Ei ua labor que damb era experiéncia poderam èster cada còp mès efectius

Eth projècte impulsat peth Conselh Generau d'Aran e era Generalitat forme part dera iniciativa Àrees Digitals, entà fomentar era aplicacion de tecnologies digitaus en conjunt e Catalunya e generar projèctes d'inversion en innovacion e desvolopament  en territòri.