Rebrembes, istòria e tradicions enes bastisses de Les

Ena bastissa de servicis der ajuntament de Les, un artista  pinte  en ua des parets, un shivau.

Er animau forme part d'ua escena que ven a representar un vielh mèstièr, eth deth haure o farrèr. Aguesta ei ua des tematiques escuelhudes en hèstau Grafftech, d'art murau o urban que s'a hèt en pòble aguesta setmana. 

Tres bastisses en espacis emblematics son es lòcs escuelhudi entà pintar muraus de granes dimensions inspiradi en bocins dera identitat locau e deth sòn patrimòni culturau. 

Ath cant der ajuntament , era escena dera Quilha deth haro. En tot préner com a base ua fotografia, er autor, Jacobo Palos, reproduís toti es elements dera hèsta. Igual qu' es auti dus muraus, es colors escuelhudi van deth nere , ath blanc, en tot combinar totes es tonalitats de gris.

S'a decidit de hèr quauquarren relacionat damb er entorn, un color grisenc de pèira, que s'intègre ben damb er ambient. Ei vertat qu'era escena ei un shinhau complicada perque i a fòrça gent e  ena composicion, i  gessen diagonaus e rèctes per toti es costats... mès pensi qu'er impacte visuau ei polit

E ena paret principau dera aubèrja Matacabòs, era pintura rebrembarà com ère enes ans 40 e 50   era entrada de Les des de França quan eth contròl doanèr ère ath laguens deth nuclèu urban.

E com auance er alcalde , Andreu Cortés,  entà atrèir eth major nombre de visitants entà Les, eth projècte de art urban se combinarà damb era tecnologia de realitat aumentada . Es imatges preneran vida en guardar-les a trauèrs deth mòbil o ua tablet.

Damb es naues tecnologies poderam liéger un QR, e es muraus preneran vida e alavetz uns personatges mos explicaran era istòria e eth contèxte  d'aguesti muraus.  Ara tot just començam en aguestes animacions que seran un atractiu hijut, entà conéisher milhor es actius o es hèts que volem destacar

Damb aguestes pintures muraus  Les, entre a formar part de un hilat de municipis qu' an integrat er art urban, ena fesomia des sòns pòbles.