Eth Conselh pressione ar Estat entà milhorar era seguretat dera N-230

Er executiu aranés sollicite tanben un refòrç des contròls de camions en sason nauta
Sofia Cabanes Balanzà

Eth Conselh Generau d'Aran a hèt a arribar formaument ath Ministèri der Interior e ath Ministèri de Transpòrts e Mobilitat Sostenibla era sua preocupacion pera situacion dera carretèra N-230, e a reclamat mesures urgentes entà milhorar era seguretat d'ua via que registre fòrça accidents e que hè ans qu'ei considerada ua des mès perilhoses der Estat. 

En dues cartes signades pera sindica d'Aran, Maria Vergés, er executiu aranés sollicite tanben un refòrç des contròls en periòdes de maxima afluéncia de transit e ua màger vigilància deth compliment des restriccions de circulacion entàs veïculs pesants. Segontes soslinhe eth conselhèr de Governacion, Andreu Cortés:

Ei mès que manifest que non podem seguir suportant aguest transit tant dens en sason nauta 

Un camion circule pera N-230 a pògui quilomètres de Vielha (Marta Lluvich - ACN)

Coma rebrembe Cortés, era N-230 constituís era principau connexion terrèstra entre era Val d'Aran, França e era rèsta der Estat espanhòu. "Ei eth tresau pas internacionau de comunicacion damb Europa e ei ua carretèra de titularitat der Estat. Nosati, amassa damb es municipis afectats lheuam era votz e per aquerò auem trasladat es nòstes peticions", ahig.

Ara madeish eth ministèri de Transpòrts trabalhe en prumèr estudi tà aishamplir era cauçada dera N-230 entre era boca nòrd deth tunèl e Vielha e dotar de mès capacitat un tram que, actuauments, recep ua mejana de 3.281 veïculs ath dia, des quaus 680 (eth 20%) son camions. Un volum que  contribuís a aumentar eth risc d'accidents e era percepcion d'inseguretat entre es usatgèrs abituaus dera carretèra. 

Er estudi determinarà com guanhar er espaci de besonh entà qu'era cauçada age sèt mètres d'amplada, ja sigue mejançant excavacions ena montanha o damb voladissi. Eth contracte se formalizèc en 2023 damb un pressupòst de mès d'un milion d'euros.

Òbres deth Ministeri de Transpòrts entara milhora deth fèrm ena N-230 (Cedida)

Milhores en fèrm

Per un aute costat, aguesti dies eth Ministèri de Transpòrts e Mobilitat Sostenible trabalhe en òbres entà milhorar eth fèrm en diuèrsi trams dera N-230. Es accions afècten ath torn de 10 quilomètres laguens d'un tram mès ample de 50 entre es punts quilometrics 124,9 e 174 entre es tèrmes deth Pònt de Suert, Vilaller, Vielha, Es Bòrdes e Vilamòs e s'an invertit 1,5 milions d'èuros. 

Segons eth Ministèri, era accion a de perméter melhorar er estat deth fèrm, refortilhar era seguretat viària e favorir ua conduccion mès confortabla.