Generalitat e Conselh Generau crompen era antiga casèrna dera Guàrdia Civil de Baqueira

Era Generalitat de Catalunya e eth Conselh Generau d'Aran an crompat ar Estat era antiga casèrna dera Guàrdia Civil de Baqueira, un edifici que hè ans qu'ei en desús. 

Era operacion, damb un còst de 3,7 milions d'èuros, a coma objectiu recuperar er immòble, de lèu 2.400 mètres quarrats, entà destinar-lo a abitatge public e assequible, en ua des zònes dera Val d'Aran a on era pression immobiliària ei mès elevada pera activitat toristica e es dusaus residéncies. 

Ara calerà estudiar es possibilitats de reforma e adaptacion dera bastissa. Entad açò, se constituirà ua comission de trabalh damb representants dera Generalitat, deth Conselh Generau d'Aran e der Ajuntament de Naut Aran, que definirà es actuacions de besonh e es possibles usatges der immòble. Era prioritat ei transformar era antiga casèrna en diuèrsi abitatges destinadi ath loguèr assequible. 

Er edifici se trape ath cant der aparcament de Baqueira 1500, ua zòna a on pendent era sason d'iuèrn ei abituau trobar trabalhadors dera estacion d'esquí que s'alòtgen en autocaravanes. 

Era manca d'abitatge entà residéncia abituau ei un des principaus problèmes dera Val d'Aran. Segontes es donades deth Plan d'Abitatge dera Val d'Aran, sonque eth 36% des abitatges deth territòri son prumères residéncies. 

Ath delà d'aguesta operacion, Naut Aran ja aprovèc hè quauqui mesi un aute projècte que permeterie bastir enquia 60 abitatges assequibles destinadi a trabalhadors, joeni e personau temporèr, en un terren plaçat a uns 50 mètres dera casèrna dera Guàrdia Civil. Entà hèr-lo possible, calerie modificar es normes subsidiàries, pr'amor qu'actuaument eth terren ei qualificat entà equipaments.