Les consolide era sua aufèrta formativa en encastre sociosanitari damb un nau cicle

Er Institut d'Ostaleria impartirà aguest cors eth cicle formatiu d'Atencion a Persones en Situacion de Dependéncia
Sofia Cabanes Balanzà

Er Institut d'Ostaleria de Les consolidarà era sua aufèrta formativa en encastre sanitari damb un nau cicle de Formacion Professionau dedicat ara Atencion de Persones en Situacion de Dependéncia. Començarà aguest cors 2026-2027 damb lèu totes es places plees. 

Aguest ei eth dusau cicle en encastre sanitari que s'impartirà ena Val d'Aran, dempús qu'est an passat s'implantèsse eth de Suenhs Auxiliars d'Infermeria. Toti dus se corsaràn en Institut de Ostalaria de Les, que pòga pòc, daurís eth sòn ventalh d'estudis damb er objectiu de devier un centre de referéncia ena formacion professionau en casa nòsta. 

Segontes Carlota Valls, directora territoriau d'Educacion en Naut Pirenèu e Aran, damb aguest nau  cicle de grad mejan d'Atencion a Persones en Situacion de Dependéncia:

se vò professionalitzar un trabalh soent pòc arreconeishut e que tan plan de persones exercissen sense cap de titulacion

Eth govèrn d'Aran prevé daurir enes pròplèus mesi era residéncia e centre de dia de Les. Per açò aguest cicle se ve coma ua grana oportunitat entà entrar rapidaments en mercat laborau: "Volem retier talent, qu'era gent que demore ací age era aufèrta suficenta entà non auer de marchar", soslinhe Valls.

Gemma Verdés, directora generau de Formacion ath long dera Vida e Carlota Valls, directora servicis territoriaus d'Educacions, amassa damb era conselhèra Angelina Cases e eth director der Institut d'Ostalaria de Les, Manel Rodríguez e personau deth centre (Cedida)

Eth nau cicle a ua durada de 2.000 ores, que se distribusissen en dus corsi e s'impartís en format presenciau e en modalitat d'FP Dual. Capacite ar alumnat entà aufrir atencion e supòrt a persones en situacion de dependéncia autant en encastre domiciliari coma institucionau. Aguest perfil professionau a ua nauta insercion laborau, mès que mès, enes encastres datencion sociosanitària, assisténcia domiciliària e es servicis de teleassisténcia.