Ensenhament cree era figura deth monitor de jòcs de pati entà refortilhar er us der aranès
Ena Escòla Sant Ròc de Bossòst, des de hè 4 ans, eth Centre compde damb ua monitora de jòcs de pati que a com objectiu arténher a trauèrs deth jòc que es escolans escoten e que sustot parlen er aranés. Aguest trebalh, supervisat peth Departament d'Ensenhament dera Generalitat ei un plan d'assisténcia de supòrt ar aranés enes espacis de léser. Un plan que neish entà refortilhar er ús dera lengua propia d'Aran dehòra des aules.
1 min
Er aranés ei era lengua veiculara enes escòles, mès er hèt que bona part des mainatges non l'agen coma lengua abituau o familiar hè que er ús dera madeisha disminuisque en àmbit sociau. Per aquerò eth trebalh deth monitor ei eth de proposar, dirigir, participar mès sustot parlar entà desvelhar er interès des mès petits pera lengua deth parçan. Atau, en tot jogar e divertí-se es mainatges sense lèu encuedar-se'n repetissen paraules e sons que pòc a pòc se incorporen ath sòn vocabulari. Ath delà des ores de pati toti es corsi an programades d'autes ores de jòcs segontes es edats e nivèus. Entà poder introduir vocabulari s'an agut de inventar o crear naui jòcs com eth deth uart, eth bestiar en corrau, eth jòc des oles, o eth des crabetes e eth lop, que se combinen damb d'auti mès tradicionaus com eth picaparet, era bomba, sautar ara còrda, eth tris-tras, eth mocador o eth palet. Jòcs que combinen vocabulari e exercicis de psicomotricitat, ua bona forma de apréner e en tot divertí-se contribuir a aumentar er ús sociau der aranés.
