Baqueira Beret inaugure era sua 61aua sason damb condicions òptimes
Baqueira Beret presentaue aguest dimars a otelèrs, restauradors e aficionadi ar esqui aranesi, era sason que hè era 61au dera sua istòria.
Ua sason que comence damb tot nheuat e açò hè que sigue eth milhor inici des darrèri ans.
Baqueira Beret encete era sason 61 dera sua istòria
4 mesi d'esqui
Cau anar ena sason 2019-2020, tà trobar ues condicions semblantes. Alavetz damb uns celhs de 90 cms poderen daurir lèu tota era estacion ena darrèra dimenjada de noveme.
Enguan damb mens nhèu, Baqueira daurirà eth dissabte 29/11, entot méter en marcha 17 remontadèrs que daràn accés a 40 pistes que sumaràn 54 km de traçats enes tres airaus, Baqueira, Beret e Bonaigua.
S'es condicions acompanhen, entath pònt dera Purisima, demoren poder daurir eth màxim d'ariau esquiable possible que enguan arribe as 173 kms esquiables.
Era sason 25/26 se barrarà eth 6 d'abriu de 2026 damb er objectiu d'arribar ath milion d'esquiaires.
Inversions
Enguan era estacion a invertit 10,3 milions d'euros, que s'an destinat sustot a renauir installacions, milhorar pistes e crompar dues machines de caushigar era nhèu de darrèra generacion.
Tanben s'an hèt melhores en hilat d'innivacion, damb 14 naui canons de produccion de nhèu mès eficienti.
Baqueira Beret ei, damb 730 trabalhadors, era empresa mès grana deth país. Entà garantir eth sòn lotjament, era enterpresa a logat otèls e viuendes en Aran e tanben enes vals vesies dera Nauta Ribagorça e eth Palhars Sobirà.
Era competicion, ua apòsta segura
Era estacion seguís damb era sua apòsta pera competicion de naut nivèu que mos da visibilitat per tot. Entre aguestes destaquen eth Freeride World Tour, era Marcha Beret d'esqui de hons, era Copa d'Euròpa d'esqui aupin masculina o eth trofèu Jesus Serra.
Tanben s'a renauit era app, Ski Track, ua airina que acompanharà ar esquiaire pendent tota era jornada e que permeterà compartir era localizacion e es esquiades damb es companhs e enes hilats sociaus, ara tan de bessonh entà èster visibles.
Dies de nhèu
Era 61au sason dera estacion aranesa e des Vals d'Àneu a compdat damb ua naua campanha enes hilats, Dies de Nhèu, que vò méter en valor es experiéncies des esquiadors que gaudissen des espòrts d'iuèrn en Baqueira Beret.
