Biel Gonzalez Fuentes, deth CAEI, ath Mondiau Junior de Biatlon

Dempús d'acabadi es Jòcs Olimpics d'iuèrn de Milano Cortina era sason de competicion seguís endeuant. Ei eth cas deth biatlon, un espòrt que combine er esqui de hons damb eth tir ara diana. Dempús de hè quate ans era RFEDi a hèt ua apòsta pera modalitat entot crear ua equipa de joeni que hègen eth saut der esqui de hons ath biatlon. A despiet que son joeni, bèri uns des integrants, sustot es gojates, ja an destacat enes competicions internacionaus.

Aguesta sason un joen aranés, Biel Gonzalez Fuentes, hè part dera equipa de tecnificacion dera FArDI (Federacion Aragonesa d'Esports d'iuèrn) dempús d'auer-se format en casa nòsta dera man deth CAEI. Eth serà un des 5 joeni dera equipa espanhòla que disputarán enquiath 8 de març eth mondiau junior de biatlon que se hè en Alemanha.

En Espanha er unic estadi de competicion se tròbe en Candanchú e pòt acuélher competicions en iuèrn e en ostiu.

Origenes

Eth biatlon a era sua origina restacada ara caça ena nhèu en nòrd d'Euròpa hè mès de 2.000 ans. A compdar deth sègle XVI, es païsi escandinaus incorporèren es esquís enes sues armades. Es prumèri Campionats deth Món se celebrèren en 1958 en Saalfelden (AUT). S'estreèc coma espòrt olimpic masculin enes Jòcs de Sankt Moritz (SUI) en 1928 damb ua pròva de patrolha militar en categoria masculina per equipes coma espòrt de demostracion. En 1960 enes Jòcs d'iuèrn de Squaw Valley (USA) competiren es òmes ja entot hèr part deth programa olimpic mentre qu'es hemnes s'i incorporèren en 1992 enes Jòcs d'Albertville (FRA).

Dinamica dera competicion

Eth biatlon combine er esquí de hons e tir damb rifle. Er objectiu ei completar eth recorrut en mens temps possible e acertar eth maxim de cibles entà evitar penalizacions. Era part d'esquí demane fòrça resisténcia e velocitat, mentre que eth tir exigís fòrça precision e contraròtle. Es esportistes an de hèr cinc tiros a 50 mètres dempús de completar eth recorregut damb esquís. Era mida dera cibla varie segontes se tire estirat, 45 mm o dret, 115 mm. Es errors se penalizen damb un minut ahijut ath temps finau o damb un torn suplementàri de 150 mètres

Modalitats

Cada disciplina varie en distància, nombre de tirades e tipe de penalizacion.

• Sprint, 10 km es òmes e 7'5 km entàs hemnes. Ei era modalitad mès explosiva deth biatlon
• Individuau 20 km òmes / 15 km hemnes. Es competidors gessen cada 30 segons e se hèn quate tirades, dues drets e dues estiradi
• Persecucion 12,5 km òmes / 10 km hemnes Es competidors perseguissen ath goanhador dera pròva de sprint
• Gessuda en massa 15 km òmes / 12,5 km hemnes Toti gessen ath temps. Eth prumèr qu'arribe guanhe
• Relèus e relèus mixtes ua pròva per equipes. Ena prumèra 4 òmes hèn 7.5 km e es hemnes 6 km. Enes relèus mixtes es equipes son formadi per dues hemnes e dus òmes que hèn cadun 6 km

Ath delà des competicions d'iuèrn, tanben se n'hèn en ostiu, "summer biathlon", a on es esquís se substituïssen per rollerskis.