Bossòst reviu era invasion dera Val d'Aran en 1944 damb ua recreacion istorica

En octobre deth 1944 mès de 4.000 maquis e guerrilhèrs sagèren de conquistar Espanha en tot entrar pera Val d'Aran. 

Pretenien derrocar eth regim franquista, en tot profitar era queiguda deth nazisme en Euròpa e d'ua supausada reconeishença des païsi aliadi, que jamès arribèc. Ua mission riscada, qualificada de suicida, e que tot just durèc 10 dies.

Recreacion istorica

Aquesta dimenjada, Bossòst viuerà era prumèra recreacion istorica sus era invasion des maquis ena Val d'Aran en octobre de 1944, un episòdi pòc coneshut dera postguèrra espanhòla, qu'er ajuntament vò que sigue un actiu turístic més.

Mès de 50 recreadors arribadi de tota Espanha portaràn ath public ad aquera tardor de hè 80 ans, quan es combatents crotzèren era termièra entà afrontar-se ath regim franquista. Eth projècte, concebut damb rigor istorica e respècte as hèts per part deth grop de recreacion Primera Linea, cerque dar a conéisher es hèts que se viueren en diuèrsi pòbles dera val, en tot mostrar era experiéncia tant des guerrilhèrs coma des abitants que viueren aqueri dies de guèrra, pòur e repression.

Memòria e reparacion

En octobre  de 2024 se commemoraue es 80 ans dera Operacion Reconquista. Eth Memorial Democratic de Catalunya, depenent deth departament de Justícia, organizèc ues jornades d'estudi e aumenatge ena Val d'Aran. 

En un acte institucionau s'autregèren certificats de reparacion as familiars d'aqueri guerrilhèrs que sagèren de liurar Espanha deth Franquisme.