CDA presente candidatures en toti es municipis tamb eth lema "Seguretat e Confiança"
Convergéncia Democratica Aranesa (CDA) a presentat listes as nau municipis dera Val d'Aran entàs pròplèu comicis deth 25 de mai. Açò supose ua nauetat, pr'amor qu'enguan s'an completat es candidatures tamb ua lista en Canejan, poblacion que non auec lista des convergents pendent es darrères dues eleccions e ara se presente entà arténher era alcaldia Mercedes Isabel González. Er actuau síndic d'Aran, Carlos Barrera, tornarà a èster eth candidat deth partit entath Conselh Generau d'Aran. Eth lema dera campanha ei "Seguretat e Confiança".
2 min
Convergéncia Democratica Aranesa ei un partit pròpi dera Val d'Aran, creat pendent era decada des novanta, e qu'a era empara de Convergéncia Democràtica de Catalunya (CDC) encara que non en forme part. Pendent era darrèra legislatura siguec era formacion tamb mès preséncia ena vida politica aranesa e a governat es dues institucions mès importantes, eth Conselh Generau d'Aran e er Ajuntament de Vielha. Ara, CDA, se presente as naui comicis, a on coïncidissen es dues eleccions eth madeish 25 de mai, tamb listes en toti es municipis dera comarca pirinenca, a 11 des 13 pedanies, e as sies terçons entara eleccion des conselhèrs dera maxima institucion aranesa. Es dues pedanies enes quaus non s'a presentat lista son Arròs e Vila e Gausac. En totes dues apue ua lista d'independents, coma ja hèc en es anterior comicis. Entre es objectius mercats pera formacion aranesa ager pera net, pendent era presentacion des candidatures, destaque era voluntat de continuar governant ath Conselh, atau coma arténher majoria absoluta en Ajuntament de Vielha. Tant eth cap de CDA, Josèp LLuís Boya, coma eth candidat a síndic, Carlos Barrera, profiteren er acte entà criticar ath son màxim opositor, Francesc Boya, que se presente per Unitat d'Aran (UA). Josep Lluís Boya diguec que eth dirigent d'UA "non a de confoner èster era autoritat tamb èster autoritari", en referéncia as paraules que eth cap dera oposicion hec dimèrcles. En aguest sentit, es dirigents de Convergéncia assegureren que eri nonvolien hèr ua campanha dura, coma uns auti partits aranesi estan sajant.
