Cremes prescrites entara prevencion de huecs e era regeneracion de peishius
Pompièrs , bombers deth Grop d'Actuacions Forestaus GRAF, de diferenti parcs de Catalunya, e pompièrs francesi, s'organizen en elipòrt de Betren, damb eth materiau de besonh, entà ua actuacion qu' ei programada, "ua crema prescrita ", que ei eth nòm tecnic que recep era aplicacion controlada de huec a estructures de vegetacion, en un lòc determinat, damb condicions de combustible fixades ,entà arténher un objectiu, ja sigue era prevencion de huecs o era regeneracion de peishius .
Era crema s'a hèt en ua parcella delimitada entre es barrancs d' Artigues en Arties, e eth barranc de Corilha en Gessa.
Ath delà des caracteristiques deth terren, sustot s'an d'auer en compde es condicions meteorologiques : era direccion e intensitat deth vent, era umiditat , e en cas d'Aran, era preséncia de celhs de nhèu enes tucs, que serviran de barrèra naturau as hlames, com ac soslinhe Gemma Arjó, cap dera seccion d' avaloracion estrategica de risc territoriau des Pompièrs d'Aran.
A nosati mos facilite era faena perque ja auem ua zòna naturau que hèm a servir d'anclatge; ua zòna ena que non mos cau auançar eth trebalh
En aguesta intervencion qu' a durat 2 dies ,s'an cremat unes 50 ectares d'arbilhons e escoba de nauta combustibilitat.
Un des requisits ei trincar era continuïtat sustot enes escobars...Er objectiu ei cremar aguestes escobes e dar més possibilitat ath peishiu entà que i pogue anar eth bestiar, e trincar damb era continuïtat dera vegetacion
Damb ajuda d' utisi manuaus, es pompièrs mèrquen es limits per a on a d'auançar eth huec , e susvelhen e acompanhen es hlames de forma estrategica, çò que permetera , en cas que en un futur se declare un huec en aguest parçan, escandir-le de manèra mès rapida.
Eth Plan estrategic deth huec en Aran, establís 12 sectors , a on de manèra periodica se haran aguestes cremes , tanben prevee era creacion enes Pompièrs d' un grop especializat , que ara ei en periòde de formacion, entà que en un futur non guaire luenhan,sigue eth que s'encuede de hèr, de forma autonòma es cremes prescrites.
