Cunhèra termica damb reanimador
Entram en paritòri der Espitau Val d'Aran damb era pediatra Pilar Alonso. Ací ath cant deth lhet se i a plaçat era cunhèra.
Dempús deth prumèr contacte deth repopet ,pèth a pèth , damb era mair e eth pair, toti es mainatjons qu' acaben de nèisher passen es prumères menutes dera sua vida per aguesta cunhèra.
Les metem aciu, entà her-les es prumèri suenhs, e se dempús, bèth mainatjon a de besonh bèra reanimacion, un shinhau d'oxigèn, aspirar secrecions, que les pogue ajudar a respirar milhor, tanben ac podem hèr aciu, e tot açò se hè tostemp ath costat dera mair e eth pair. Eri i son presents en tot moment
Aguest equipament incorpòre un sistèma integrat que permet configurar era cunhèra, autant entà mantíer era temperatura corporau des nenets e nenetes , entà hèr reanimacions respiratòries complètes, mesurar era freqüéncia deth còr , a trauèrs d' un electrocardiograma ,o era monitorizacion d' oxigèn en sang des repopets.
Entara doctora Alonso, ua des principaus auantatges dera cunhèra ei eth que facilite era reanimacion respiratòria, ua des insuficiéncies lhèus mès comunes qu' an es mainatjons acabadi de nèisher.
Era major part des repopets acabadi de nèisher , sonque damb un shinhau d'estimulacion ja van ben, mès n' i a d'auti qu' an de besonh un supòrt respiratòri, ua ajuda ... Era mashina mos permet decidir a quina pression volem qu' entre er aire enes petiti paumons e damb quina freqüéncia. I a viatges que sonque son de besonh dues o tres menutes e pro.
En èster dubèrta , sense cubèrta , ne hiestretes, era cunhèra termica permet en tot moment er accès autant des professionaus sanitaris com des pairs e es mairs, çò que fomente eth vincle afectiu damb eth repopet.
