Era CHE avalorarà er estat dera Garona aguest octobre
Tecnics dera Confederacion Idrografica der Èbre (CHE) avaloraràn aguest mes d'octobre er estat der arriu Garona ath sòn pas per diuèrsi pòbles dera Val d'Aran. Ac haràn dempús qu'er executiu aranés envièsse dies endarrèr ua carta ath president der organisme de conca en tot reclamar ua neteja urgenta der arriu per arrasons de seguretat.
Era CHE avalorarà er estat dera Garona aguest octobre
Dempús des grèus inondacions de junh deth 2013 era mair der arriu Garona non a estat netejada ath sòn pas pera Val d'Aran. Pendent aguesti 12 ans, ath long deth cors der arriu s'i an acumulat troncs e arròques, s'an format ièrles e an creishut arbes. Tot aquerò, represente un perilh en cas de naues inondacions e atau li a hèt a saber era sindica d'Aran, Maria Vergés, ath president dera CHE, Carlos Arrazola:
era preocupacion ei grana, perqué ua naua avenguda fòrta d'aigua sus aqueres ièrles que s'an acumulat poiria collapsar infraestructures o provocar damatges importants que meterien en risc era vida des persones
Entà actuar laguens dera mair der arriu entà talhar arbes o eliminar es ièrles de sediments que s'i an format cau un permís especiau dera CHE. Er Ajuntament de Vielha e Mijaran ja hè lèu dus ans que lo demane, damb insisténcia, sense succès, com constate Juan Antonio Serrano, eth baile: "nosati auem insistit en aguest ahèr des de hè dus ans. Molti còps mos didien que damb ua simpla comunicacion poiríem actuar, mès en cas de Vielha, damb aguesta comunicacion non ei sufisent, pr'amor qu'era actuacion que cau hèr ei importanta".
Ara hè lèu 9 mesi eth consistòri demanèc un nau permís ara CHE dempús de modificar eth projècte qu'er Ajuntament presentèc a inicis de 2024. "Encara èm ara demora de recéber ua responsa e ja les ac auem demanat mès de 10 viatges", soslinhe Serrano.
Era responsa dera CHE
Arribadi ad aguest punt, era CHE, a reaccionat. Eth sòn president a responut era carta dera sindica e assegure que enviarà previsiblaments eth 15 d'octobre ua equipa tecnica entà determinar en quini punts cau actuar e quines mesures calerà préner entà netejar er arriu.
En cas de Vielha, atau e coma a metut de manifèst eth sòn Ajuntament, es zònes problematiques se tròben ath costat der Institut e dera Escòla d'Infantila e Primària. Per çò que hè, entre d'auti, ath municipi de Les, eth risc de collapse se d'infraestructures viàries ei naut e se trape en zona periurbana, passada era Lana. Atau madeish, en cas de Bossòst ei de besonh poder actuar ena entrada dera Garona en tram urban, en tot netejar e rehèr proteccions.
