Era Val d'Aran, punt de referéncia occitano-catalana
Era creacion d'un marc de reflexion e debat ei er objectiu des Jornades Universitàries OccitanoCatalanes, qu'an celebrat enguan era sua sisaua edicion. Deluns se dec eth tret de gessuda a ua setmana plia de seminaris, corsi, conferéncies e talhèrs, encara qu'era conferéncia inaugurau, qu'auie de hèr er eurodeputat italian Luciano Caveri se suspenec en éster impossible era su preséncia ena Val d'Aran.
1 min
Es corsi an compdat tamb fòrça assistents, coma eth que giraue ath torn dera codificacion des lengües pirinenques e a on se presentaueb es problematiques que viuen er aragonés, eth basc, eth catalan e er occitan. Era organización corrie a cargue deth departament de filologia Catalana dera Universitat de Lhèida. Tanben son fòrça es que s'apunteren ath talhèr de dances tradicionaus dera Arièja, qu'auie ua longada de dotze ores e l'impartien integrants dera Associacion d'Ensenhaires d'Arièja. Acompanhats tamb cant e instruments, es participants an aprés es passi de bassa e tanben es dances deth Coserans, parçan vesin dera Val d'Aran. Era borrèga de Massat, era crotzada d'Esplàs de Seron o era Planherada de Saurat son quau'ua des dances que s'an ensenhat pendent eth talhèr. Un des seminaris mès demorats ere eth dedicat ath metòde EuroComRom, que mos permet apréner a liéger es lengües romaniques simultanèament. Damb era base deth coneishement deth catalan, deth castelhan e der aranés, eth lector pòt accedir a totes es autes lengües romaniques. Segontes Tilbert Dídac, docent deth cors, "poderie éster aguest un bon instrument entara Euròpa deth futur". Es Jornades Universitàries OccitanoCatalanes les organize Eth Conselh Generau d'Aran, tamb era collaboracion dera Generalitat de Catalonha, dera Universitat de Lhèida e dera deputacion.
