Es televisions locaus emeteràn programes e notícies sus era realitat aranesa en Catalonha
Era Mesa de Televisió Local de Catalunya, ena quau son representades 82 televisions locaus, an signat un acòrd tamb eth conselh Generau d'Aran peth quau aguestes emissores se comprometen a eméter espacis e notícies sus era realitat culturau, sociau, politica e economica dera Val d'Aran. En determinats casi, coma per exemple en es intervencions des ciutadans dera Val d'Aran, es televisions locaus emeteràn es talhs de veu en aranés.
1 min
Era conselhèra de Cultura deth Conselh Generau d'Aran, Mercè Delaurens, e eth portanveu dera Mesa de Televisió Local de Catalunya, Josep Vilar, signeren eth conveni ena sedença deth Consell de l'Audiovisual de Catalunya (CAC). Tanben i esteren presents es membres deth CAC ena Comission de Seguiment der Audiovisuau en Aranés, eth vicepresident, Xavier Guitart, e eth conselhèr Jaume Serrats i Ollé. Delaurens expliquec que eth conveni ei un pas important, perque permeterà dar a conéisher en Catalonha era realitat aranesa. Era conselhèra expliquec que eth conveni ei un prumèr pas que cau desvolupar entà concretar era forma coma s'incremente era preséncia dera Val d'Aran. Higec que encara no i a un calendari definit mès confie que es televisions locaus de Catalonha difonguen es prumères notícies e programes a finaus d'an.
