Eth Conselh Generau d'Aran cree dus naui cargues de confidança

Eth departament de promocion economica le portaràn Francesc Medan e Artur Sànchez, qui, tamb Mercedes Delaurens, tanben s'harà cargue dera conselheria de Sanetat, Benestar Sociau e Família. Delaurens serà era responsable deth departament de Cultura e Ensenhament e deth Departament de Joenessa e Espòrts se n'encuedarà Joan Estévez. Ua des nauetats entà d'aguesta legislatura ei era creacion dera Comission Informativa Permanenta de Servicis Generaus, que siguec aprobada per unanimitat e que la compausaràn tres membres de Convergéncia Democràtica Aranesa e tres dera oposicion. Pendent eth plen tamben se nomenteren ueit cargues de confidança, dus d'eri creats en aguesta session. Se tracte deth Cap de Servicis Generaus, un lòc qu'aucuparà Mariona Capdevila, e dera responsabla d'organización d'actes, cargue que quede en mans de Victòria Saurina. Entre es cessaments mès destacadi i a eth deth director de Servici Aranés dera Salut, Joan Coma, qui a renunciat ath cargue per problemes personaus. Coma serà substituït per Francesc Fernàndez Enrich. Pau Perdices, ex alcalde de Vielha, torne ath Conselh, en tot aucupar eth cargue de director executiu. Continuen en es madeishi lòcs Manolo Español, ath capdeuant de Torisme Val d'Aran, Joan Canalias, director generau de Pompièrs e Proteccion Civil, Miquel Campà, coma adjunt a sindicatura e Felip Benavent, subdirector deth Servici Aranés dera Salut. Es grops dera oposicion, Unitat d'Aran e Partit Renovador d'Arties e Garòs, s'abstengueren en totes es votacions de nomentament de cargues de confidança e voteren en contra dera creacion des dus naui lòcs d'aguestes caracteristiques. Es sòus des cargues de confidança van des 16.230 èuros anuaus, que crobarà era responsable d'organización d'actes, as ueitanta cinc mil ueit cents vinta quate que crobarà Francesc Fernàndez, director deth Servici aranés dera salut.