Eth Conselh Generau demanara ua auditoria de foncionament dera residéncia de Les
Era Residéncia de Temps liure de Les que gestione eth departament de Trebalh dera Generalitat torne a èster motiu de polemica. Er ajuntament de Les a demanat ara Generalitat era reversion des bastisses que sigueren cedides en ús ath govèrn catalan enes ans 80. Era presentacion dera demana civil de reversion coincidís lèu en temps damb era celebracion dera amassada dera comission mixta de traspassi Generalitat-Conselh Generau que se harà eth dia 8 de mai en Barcelona.
1 min
En aguesta amassada ei previst de firmar tres documents enes quaus s'acòrde que era Generalitat cedís eth 37% dera bastissa B, dera Residéncia aué en desús, ath Conselh Generau, que ath sòn viatge la met a disposicion deth Departament de Ensenhament entà que bastisque era naua escòla d'ostalaria. Eth govèrn aranés s'encuedarà per aguest madeish acòrd de adaptar era 4au. e 5au. planta dera bastissa coma residéncia de estudiants. Enes mesi d'estiu es abitacions seran a disposicion dera residéncia. Eth tresau document prevee era creacion d'ua comission de seguiment formada per un representant dera Generalitat, deth Conselh Generau e der ajuntament de Les entà dinamisar, potenciar e sustot sajar de reduir es pèrtes d'explotacion dera residéncia, que son segontes eth Conselh Generau d'uns 800.000 euros anuaus. Er incompliment per part dera Generalitat des condicions pactades quan se cediren es bastisses a portat ar ajuntament ara demana de reversion dera residéncia. Eth síndic Carlos Barrera critiquèc era postura der ajuntament de Les, perque entorpís que eth govern aranés pogue assomir es competéncies previstes ena Lei d'Aran. Eth Conselh Generau demanarà ua auditoria entà conéisher eth foncionament e es còsti de explotacion dera residéncia de léser e temps liure de Les.
