Eth minjar servit en Espitau d'Aran, eth mès ben avalorat de Catalonha

Es darrèri resultats deth Plan d'Enquèstes de Percepcion, Experiéncia e Satisfaccion -eth PLAENSA- deth Servei Català de la Salut situen er Espitau de Vielha coma eth centre sanitari catalan mès ben avalorat en çò que tanh ath minjar servit as pacients ingressadi. 

Damb un 83,9 sus 100, eth minjar servit en Espitau d'Aran ei eth qu'a obtengut melhor nòta en tota Catalonha entre un totau de 56 espitaus qu'an format part der estudi. Lo seguissen d'apròp er Espitau de Palamòs o era Fondacion d'Espitau der Esperit Sant, en Santa Colòma de Gramenet. Eth secrèt d'aguest bon resultat, segons era directora deth Servici Aranés de Benèster e Salut, Maria Angels Borràs, "ua bona coordinacion entre es professionaus" e "eth hèt d'èster un espitau petit". 

Eth centre sanitari de referéncia ena Val d'Aran tanben a artenhut es melhors resultats a nivèu catalan en factors coma era tranquillitat entà descansar pera net o eth hèt d'arrecéber ua informacion coerenta, atau coma era sensacion de senter-se en bones mans. Segontes era sindica d'Aran, Maria Vergés, 

"tot aquerò a veir damb eth hèt de poder gestionar aguesta competéncia de forma directa, pr'amor que mos permet adaptar eth sistèma as besonhs deth nòste territòri"

Pòdi en grad de satisfaccion globau

Se mos fixam en grad de satisfaccion globau, er Espitau d'Aran artenh era tresau melhora nòta de Catalonha, peth darrèr der Espitau Clinic de Barcelona e er Espitau Comarcau d'Olot e era Garrotxa. Un resultat "plan satisfactòri", segontes Mari Àngels Borràs. "Tà nosati ei un gran orgulh, pr'amor que èm er Espitau mès petit de Catalonha", soslinhe.

En cas deth Espitau d'Aran er estudi s'a hèt a compdar d'ua ueitantia d'enquèstes as pacients.